Mizoram Police din champha vawi 52-na pualin hmun hrang hrangah hun hman a ni

Mizoram Police-a unit hrang hrangte chuan Mizoram Police din champha vawi 52-na (January 21) pualin January 22, 2024 khan kawng hrang hrangin hun an hmang.

Aizawl district-a police station hrang hrangte chuan Mizoram Police din champha pualin sikul pariatah Cyber Safety Campaign an buatsaih a, zirlai 450 chuang an tel a ni.

Mizoram Police Radio Organization (MPRO) Headquarters chuan January 22, Thawhṭanni khan Social Work Cleanliness Drive an hmang a; Khatla kâwn leh bazar leh a chhehvel tifaiin an hnatlang.

Kulikawn Police Station chu Thawhṭanni khan 3rd MAP English Medium School zirlaite'n an tlawh a, police station-a hnathawh dante an lo hrilhfiah. Bungkawn Vengthar Middle School zirlaite pawhin SP Security pisa an tlawh a, 'My perception of and expectations from Mizoram Police' tih thupui hmangin essay competition an lo buatsaih bakah, an hmanraw kawlte an lo entir a ni.

January 22 vêk khan CID (Crime) chuan CID (Crime) pisa leh Crime & Economics Offences Police Station tlawhna hun buatsaihin, CLS Academy zirlai 47-te'n an tlawh a, police nihphung leh hnathawh tlangpuite an hrilhfiah.

Special Narcotics Police Station chuan Home Missions School-ah ruihhlo hmansual chungchang inzirtirna hun an buatsaih a, zirlai 76 an tel. Cyber Crime Police Station chuan JL Higher Secondary School zirlai 30-te an pisaah cyber crime leh a kaihhnawih thil chi hrang hrang an zirtir.

Serchhip district police-te chuan Serchhip H/S, North Vanlaiphai H/S leh Thenzawl Presbyterian English School-ahte legal awareness campaign an buatsaih a, Indian Penal Code, MV Act, NDPS Act, cyber crime leh POCSO Act chungchangte an hrilhfiah.

Lunglei district police-te'n LKM English Boarding School, Lungleiah cyber security, POCSO, damdawi hmanrual, MV Act chungchangte inzirtirna hun an buatsaih a; 'Crime against women & children tih thupui hmangin drawing/painting competition an buatsaih nghal.

Tlabunga Modern H/S, Lungsena Gospel Centenary English Medium School leh Bunghmunga Model H/S-ahte cyber security, POCSO Act, ruihhlo leh MV Act chungchangte inzirtirna hun hman a ni. Heng bakah hian, district dangahte leh police station hrang hrang hnuaiah Mizoram Police din champha vawi 52-na pualin inzirtirna chi hrang hrang buatsaih a ni bawk.