VC ṭheh loh rama lo hâl hun atan February 2024 chhung ruat a ni

Khawzawl District Committee on Fire Prevention chu nimin khan district bawrhsap K Lalrohlua hoin an ṭhukhawm. Kumina VC-te ṭheh loh rama lo hâl turte chu February 2024 chhunga hâl vek turin an rél.

K Lalrohlua chuan, February 5-9 chhunga Kangmei Venna Hapta hman tur chu inzirtir tharna chauh a nih thu a sawi a, "Mizoram bak chu ram dang kan nei lo a, thing leh mau, nungchate humhalh kawngah inzirtirna ṭha zawk kan mamawh. District fai bera thlan kan ni tawh a, kângmei vên kawngah te, ramsa, nungcha, thing leh mau, leh lui sangha humhalh kawngah Mizorama ti ṭha ber ni turin ṭan kan lâk a ṭul," a ti.

Kângmei tichhuak emaw, ramsa humhalhte tichereu zawnga che hriate chu a hnenah emaw, Khawzawl Wildlife Division hotute hnenah emaw hriattir turin DC chuan mipui a ngen a ni.

Ṭhutkhawmah hian, state-a thuneitute'n an rel angin, March 15, 2024 aia tlai loah lo hâl vek turin hriattirna siam an rel a; Khawzawl district-a VC-te ṭheh loh ram, mahni huan/lo/ram vatte chu February thla chhunga hâl vek ni se, an ti.