Minister-in BBBP scheme a tlangzarh

Social Welfare, Tribal Affairs, Women & Child Development (SWTAWCD) minister Lalrinpuii chuan nimin khan a pisaah National Girl Child Day 2024 pualin sex ratio tihṭhat a, hmeichhe nau piang tihpuna tura hmalakna 'Beti Bachao Beti Padhao (BBBP) scheme a tlangzarh.

Lalrinpuii chuan, naupai laia mipa nge hmeichhia tih hriat tuma thil tih chu dan kalh tlat a nih thu sawiin, "Eng mi pawh lo piang se, kan fate chu thliar loh tur a ni. Mizo hmeichhiate'n dinhmun sang tak tak an chelh theih zelna tura ṭan lâk a pawimawh a, infiamna lama hmeichhiate'n hma an sawn zel a, hlawhtlinna an chan zel theih nan anmahni enkawltu nu leh pate'n an fanute an enkawl dan leh an zirtir dan a pawimawh," a ti a, ṭawngkam hman pawh fimkhur a ngaih thu a sawi.

National Girl Child Day hi kum tin January 24-ah hman a ni ṭhin a; Mizoram pumah sorkar damdawi-ina hmeichhe nau piang lawmpuina thilpek neih tura ruahmanna kalpui mek a ni.

Inkhawmah hian Women & Child Development director Zoramthangi Chhangte kaihhruaiin thutiam sawi rual a ni a; Women & Child Development deputy director Flora Lalṭanpuii'n hmalak dan hrang hrang a sawi.

National Girl Child Day pual hian New Secretariat Complex-ah minister leh NGCD programme-a tel sawm bikte'n Pencil Pine thingṭiak pakua an phun bawk.