KHAWTHLIR

Pawisa chawitir

Aizawl District Anti Tobacco Squad chuan nimin khan Laipuitlang leh Bawngkawn inkara sorkar pisa hrang hrangah phal lohna hmuna mei zù an awm leh awm loh an endik a, vaihlo kaihhnawih dan bawhchhia mi pali an man a, pawisa an chawitir a ni.

Lawmpuina hlân

YMA, Tripura Group hruaitute chuan nimin khan chief minister Lalduhoma chu a pisaah lawmpuina an hlan a; "Zo fate Chief Minister-ah kan ngai che a, i office-ah ngei lawmpuina rawn hlan che kan duh avangin kan rawn kal a ni," an ti. Tripura Group YMA inkhawmpuiah khuallian atan an sâwm nghal a ni.

Fimkhur turin chah

Mamit district magistrate VL Remliana chuan thupek chhuahin, tunlaiin Mizoram leh ṭhenawm state-ah ran hri léngin ziaawm lam a pan thei loh avangin ran vulh chungchangah fimkhur turin mipui a chah. Ram dang, district dang leh state dang aṭanga vawk la lut/lei duh chuan Mamit district AH&Vety department aṭangin hriatpuina leh phalna lâk hmasak tur a nih thu a tarlang.

Chawimawina hlân

Junior Engineer Service Association of Mizoram chuan nimin khan chief minister Lalduhoma chu a pisaah hmuin, chawimawina an hlan a; Chief Minister's Relief Fund atan Rs 50,000 an pe bawk.

Kawng enfiah

PWD minister Vanlalhlana chuan nimin zingah khan a bial Aizawl North-I chhunga Chaltlangah Aizawl Road North Division hnuaia cheng nuai 17.25 sênga veng chhung inkalpawhna kawng thawm ṭhat hna thawh tur a enfiah.

Siahaah training

Siaha DRDO conference hall-ah nimin khan 'Annual Training on Civil Registration System for Registrar of Births and Death 2024' buatsaih a ni a, Siaha additional DC Lalnunmawii'n a hmanpui. Lalnunmawii chuan, nau piang leh mitthi zat data dik tak vawng turin RBD-te a chah.