Ration card khul nawn ngai dawn lo Tum khatah thla 1 quota buhfai sem dawn

Food, Civil Supplies & Consumer Affiars (FCSCA) minister John Rotluangliana chuan, ration card dik lo siamṭhatnaah mipuite'n ration card khulna atan sum an sen belh a ngaih tawh loh tur thu a sawi a; April thla aṭang chuan thla khat daih quota ṭum khata sem a nih tawh tur thu sawiin, "Retailer-te pawh thla khat chhung an inhawng tur a ni," a ti.

FCSCA Minister hian nimin khan a pisaah thuthar thehdarhtute a kâwm a; ration card thar chu mipuiin Rs. 10-a an khul turin sorkarin a ruahman thu a sawi a, "Ration card man kan la lo a, VC leh local council-te'n Rs. 20-tein an khultir hi kan hriatpui lo," a ti.

Zawhna chhangin, VC/LC ṭhenkhatin sorkar thu ang loa ration card khulna atana Rs. 10 aia tam an lak avangin a latu VC/LC-te an department-in a hrem theih loh thu a sawi.

Food Security dawng tura thlan tawh, ration card dawng lo an la awm tih sawiin, Minister chuan, chungte chu chinfel mek a nih thu a sawi a, "Food Security dawng thei tura Selection Committee-in an thlan, ration card la dawng lote pawhin quota la thei turin DCSO-te order pek vek tawh a ni," tiin, order chu March 17, 2016-ah chhuah a nih thu a sawi.

Ration card la dawn loh vanga buhfai la thei lo mi tam tak an awm vanga zawhna chhangin, "Retailer-te'n an ngaihven tur a ni a, ration card la pek chhuah lohte daih tur DCSO-ah quota an dil belh tur a ni," a ti.

John Rotluangliana chuan, April 2016
aṭang chuan buhfai thla khat quota mipui hnenah ṭum khata sem chhuah nghal vek tawh tur a nih thu sawiin, "Mipuiin buhfai an lak kim hma chuan retailer-te'n thla khat chhung an kudam an hawn a ngai tawh ang," a ti.

March thla quota hmun ṭhenkhatah mipuiin an la lak kim loh chungchangah, ṭum hnih sem chhuah tura ruahman a ni a, a ṭum hnihna tur allotment order March 17, 2016-ah tihchhuah tawh a nih thu leh, sem mek zel a nih thu a sawi.

Ration card-a dik lo awmte chu FCSCA-in an hriat thu leh tihfuh tawk loh an nei tih sawiin, Rotluangliana chuan, "Dik lo a awm tih hre chungin, ration card pek chhuah a nih hma chuan Central-in buhfai min pek theih loh avangin, a hnua siamṭhat leh mai turin kan tichhuak ani," a ti a; ration card-a dik lo awm chuan ration lak turah nghawng a neih loh thu a sawi.

Supply Minister chuan, ration card chu identity proof atan hman phal a nih loh thu a sawi a, "Central-in min hriattir tawh angin, identity proof atan ration card hman phal a nih loh thu March 30, 2016 order chhuah a ni tawh a, sorkar department tinte pawh kan hriattir tawh. Private company leh firm-te pawhin an phût tur a ni lo," a ti.

MNF party-in minister aṭanga báng tura an phût chungchangah John Rotluangliana chuan, "Ka báng dawn lo. Minister ni tur hian rei tak kan bei ve a, kan hotupain châwl tura min ti a nih loh chuan, anni tih mai maia bang tur ka ni lo," a ti a; fate hminga sorkar sum dah pun a nih ve loh thu a sawi.

FCSCA Minister chuan, Food Security hmang tura inbuatsaih nan technical assistant mi 130 an lak thu a sawi a, mahse, chung mite zingah chuan mi rinawm lo an awm thu sawiin, "Laptop kan kawltirte pawh lo hralh tâwkte an awm. Mi rinawm lo zualte chu kan chawlhtir tawh," a ti.

Minister ṭawiawmtu, FCSCA secretary Dr Franklin Laltinkhuma chuan, Food Security-a ration card chu final a la ni lo tih sawiin, "Nakinah complaint box kan la siam dawn a, mipuiin an hming ziah lan kher ngai loin thil dik lote an report thei dawn," a ti a; Food Security kalpuinaah sorkar ṭawiawm turin mipuite a ngen.

FCSCA Minister sawi Ṭhenkhatte

θ Ration card dik lo siamṭhat tawh card khulna sum sen a ngai lo.

θ April 2016 aṭangin ṭum khatah thla khat daih buhfai quota sem a ni ang.

θ Retailer-te thla khat chhung an inhawng dawn.

θ Ration card khulna man Rs. 10 aia tam la VC/LC-te kan hrem thei lo.

θ Food Security-in a huam, ration card la dawng lote pawhin ration buhfai an la vek thei tura tih a ni.

θ Ration card-a dik lo awmah FCSCA-in tih fuh tawk loh kan nei.

θ Ration card-a dik lo awmin ration lak turah nghawng a nei lo.

θ Ration card hi identity proof atan hman phal a ni lo. Order pawh chhuah a ni tawh.

θ MNF-te phûtna vangin ka báng dawn lo.