Sum lapse a awm kan hre lo - Finance department

Finance department hotute chuan, sorkar kum liam ta 2015-2016 ah sum hman hman loha liam (lapse) a awm an hriat loh thu an sawi.

Vanglaini palai zawhna chhangin Finance secretary Lalropara chuan, sum lapse a awm lohna atan theihtawp an chhuah tih sawiin, "Sorkar kum tawp dawn-ah department lam kan nawr reng a, Treasury hrang hrang leh bank-te nen pawh kan inbe pawp reng a, sum lapse a awm lohna atan kan ṭang hle. Kan hriat theih chinah chuan sum lapse a awm lo," a ti.

Lalropara chuan, sorkar laipuiin sum a pek chhuah tlai vanga K-deposit-a dah leh department lamin an hman hman dawn loh vanga sorkar kum thara hman tura dil mai tura tih an neih thu sawiin, "K-deposit-a pawisa dah tam hi kan duh lo a, mahse, sorkar laipuiin a sanction tlai avangin loh theih loh a awm ve a ni," a ti a; K-deposit-a sum awm a tlakhniam zel thu a sawi.

Finance Secretary sawi danin, sorkar kum tawp dawn khan Mizoram sorkarin Way and Means hmanga Reserve Bank of India-a sum pûk leh overdraft a neih loh bakah, RBI-a Mizoram account-ah cheng vbc. 50-60 vel a awm.

Kumin sorkar kum liam taa an sum enkawl danah tiṭha ve hlea an inhriat thu sawiin Lalropara chuan, "Finance Minister kaihhruaina hnuaiah theihtawp kan chhuah a, keimahniah chuan kan lawm ve hle. Kan sum dinhmun pawhin ziaawm lam a pan ve hret hret zel a ni," a ti a; kumin sorkar kumah sum enkawlna lamah hmasawn zel an tum thu a sawi.