School Education hotuten sikul an tlawh Sikulte uluk taka vil kan tum: H Rohluna

Nimin kha kum 2016-17 atana sikul kai ṭan ní a ni a, School Education, MBSE, SCERT department-a officer-te leh DIET lecturer-te chu nimin khan insem darhin sorkar sikul hrang hrang an tlawh kual.

School Education minister H Rohluna chuan nimin khan kum 2016-17 atana Republic High School hawn ṭanna hmanpuiin, sikulte uluk taka vil tum a nih thu a sawi.

H Rohluna chuan, zirna chu engkim bul a ni tih sawiin, "Mihring leh ram hmasawnna hi zirna aṭanga lo kal a ni. Holam deuha zirtirna pek chuan hnamin a tuar thei. Zirtirtute tana pawimawh ber chu zirlai naupangte an ni a, zirtirtute chu zirlaite tan nu leh pa, hruaitu, ṭhian leh innghah ngamna tling an ni tur a ni," a ti.

School Education Minister chuan, monitoring leh supervision mumal taka kalpui chhoh tum mek a ni tih sawiin, "Hemi atan hian hma lak mek a ni," a ti a; zirtirtute chu naupangte tan hma lam êng tak siamsak tura theihtawp chhuah thar turin a sáwm.

Tata Institute of Social Sciences (TISS)-te nen Connected Learning Initiative (CLIx) kalpui a ni dawn tih sawiin H Rohluna chuan, "Mizorama naupangte computer hmanga zirtirna pek an ni ang a, subject pawimawh pathum - english, science leh mathematics-te chu computer hmang hian zirtir tur a ni," a ti.

Minister sawi danin, tun dinhmunah primary school aṭanga high school thlengin zirtirtu post ruak hnawhkhah loh 1,249 a awm a, chu'ngte hi sum awm dan azir zela hnawhkhah tum a ni. High school bikah mathematics zirtirtu 68 leh science zirtiru 47 atan special recruitment tih tum mek a ni.

Nimina sikul hawn ṭan ní-ah hian School Education department ruahman angin, district hrang hrangah officer-te chuan sorkar sikulte an tlawh kual a; Aizawl khawpui bikah chuan sikul 172 an tlawh a, khawtlang hruaitute kaihhruaina hnuaiah zirtrtute nen an inkâwm nghal.

Sikul an tlawhnaah hian School Education Minister-in zirtirtute a fuihna thuchah chhiar chhuah a ni a, zirtirtute'n inpekna thar an neih theih nan intiamna hun an hman bakah, zirtirtute attendance lak vek a ni.

Code of Professional Ethics for Teachers bawhzuiin headmaster tinte chu an sikul ṭheuhah hma la zui tura tih an ni.

Education department hotute hian nimina sikul an tlawh hman lohte chu kar leh chhunga tuam chhuak vek an tum a ni.