KHAWTHLIR

Myanmar-ah CM Hawla

Chief minister Lal Thanhawla chuan April 6-7 chhunga Tahan, Myanmar-a Chapchar Kût hmanpui turin Thawhlehni khan Rangoon, Myanmar a thleng a, nimin khan Tahan a pan. CM hian Chapchar Kût zawhah Rangoon panin Rangoon-a Mizo awmte nen an inkawm ang. Chapchar Kût hmang tur hian Central YMA hruaitute pawh Tahan-ah hian an kal.

Inthlan hun

State Election Commission chuan hriattirna chhuahin, Chakma Autonomous District Council-a Mandirasora MDC constituency-a bye-election leh CADC hnuaia village council-te inthlan hun atan April 28, 2016 a ruat. V/C inthlana vote tlate chu vote thlak zawh veleh chhiar tur a ni a, bye-election-a vote tlate chu April 30, 2016-a chhiar tur a ni thung.

MHIP conference

Mizo Hmeichhe Insuihkhawm Pawl (MHIP) Hnahthial Block chuan nimin khan Hnathial Bazar building-ah Conference vawi 12-na an hmang a, minister Lal Thanzara khuallian a ni. Minister chuan, HIV/AIDS do kawnga hma lakpuiah MHIP member-te a sáwm.

SRS tanpui

Central YMA hnuaia ruihhlo do pawl SRS-te ṭanpuina atan tun hnai khan Mission Veng Presbyterian Kohhranin Rs. 20,000 leh Tuikhuahtlang Presbyterian Kohhranin Rs. 10,000 an hlan.

Saitualah seminar

Saitual College chuan nimin khan IQAC leh RUSA-te nen ṭanghoin Saitual College-ah 'Choice based Credit and Grading System' tih thupui zirhona an buatsaih a; Prof. Lalnundanga, MZU-in thupui a sawi.

Oil man tisang

International market-a tuialhthei man a san hret avangin IOC chuan petrol man litre khat zelah Rs. 2.19 leh diesel man litre khat zelah pawisa 98-in a tisang a, FCSCA department pawhin Mizorama hman turin a man a tisang. Aizawlah chuan petrol litre khat Rs. 57.80 leh diesel litre khat Rs. 46.42 a ni a, extra premium man chu petrol pangngai aiin litre-ah Rs. 2.99-in a sang.