Forest Minister-in ramngaw leh nungcha Theihtawpa humhalh turin YMA a sáwm

Environment & Forest (E&F) minister Lalrinmawia Ralte chuan, ramngaw leh nungchate humhalh ṭhat an nih loh chuan a tuartu tur chu mipuite an nih thu a sawi a; YMA-te chu thâ thlah loa ramngaw leh nungcha humhalh kawnga theihtawp chhuah zel turin a ngen.

Ramngaw leh nungcha humhalh kawnga hma la ṭha Sihphir leh Sihphir Venghlun branch YMA-te nen nimina a pisaa an inkawmnaah Lalrinmawia Ralte chuan, "Kan chhehvel ramngaw leh leilung neitu dik tak chu sorkar ni loin mipuite kan ni. Kan humhalh ṭhat loh chuan a tuartu tur chu mipuite vek kan ni tih kan hriat a, uar zawka ramngaw leh nungcha humhalh kan inzirtir chhunzawm zel a ṭul a ni," a ti.

E&F Minister chuan, Central YMA-in ramngaw leh nungcha humhalh beihpui a thlak aṭang leh sorkarin inzirtirna a buatsaihte chuan rah a chhuah mek thu a sawi.

Inkawmkhawmna hi addi-tional PCCF Rosiama Van-chhawng-in a kaihruai a; PCCF Lal Ramthanga leh CYMA vice president Vanlalruata ten thu an sawi bakah, Sihphir leh Sihphir Venghlun YMA-te ramngaw leh nungcha humhalh tura an hmalak dante sawi a ni.

Sihphir Branch YMA hian a rûka sa pêl ṭhinte silai panga an man sak a, chu'ng silaite chu CYMA hnenah an hlan. Sihphir Venghlun Branch YMA hian Puansen ramah nungcha humhalhna (sanctuary)
ṭha tak an siam a, eco-tourism atan buatsaih an tum a ni.