Larsapin Lunglei khawpui a tlawh

Governor Lt.Gen. Nirbhay Sharma chuan nimin khan Lunglei a tlawh a, Saikuti Hall-a vantlang inkhawmah thu a sawi bakah, Industrial Training Institute (ITI) leh Lunglei Civil Hospital a tlawh.

Governor chuan, Lunglei chuan Mizoramah kawng tam takah a ber nihna a lo hauh tawh ṭhin tih a hriat thu sawiin, "Mizoram hmasawnna atan mi dangte entawn turin tun aia nasa zawk ṭan an lak a ṭul. Ram hmasawnna atana pawimawh pathum - leilung hausakna, remna leh muanna bakah lehkhathiamnate Mizoramah a awm sa tawh a, hlawhtlinna thawkchhuak turin remkhawm a ṭul," a ti.

KMMTTP leh border trade centre hmun hrang hranga buatsaih mek chhawr ṭang-kai turin Mizo ṭhalaite'n hman-hmawh taka thiamthil an zir a ngai tih sawiin Larsap chuan, "Rêl kawng Sairangah a luh hunah phei chuan Mizoramin a thawh sên loh hna a nei dawn a ni," a ti a; Mizo ṭhalaite chu hnathawk thei tura an lo inbuatsaih a ṭul thu a sawi.

Governor chuan, Mizoram chakna hnár chu tlawmngai pawl hrang hrang, kohhrante leh sorkar thawhhona a nih thu sawiin, "Hmasawnna lian tham nei tur erawh chuan Mizo mipuite an inhawn zau zel a ngai. Mizo ze mawi hlamchhiah chuang si loa páwn lam hmasawnna leh thiamnate Mizote'n kan seng luh a, kan hnam ziarâng mawite mi dang hriattirin kan rilrute kan inhawn zau a hun," a ti.

Larsap hian vawiinah Lunglei district chhunga officer-te a kawm bakah, Lunglei khawpui chhung leh páwna hmun pawimawhte a tlawh ang.