Thli, rial tla leh ruahsûr vangin Mizoramah in 370 a chhia
April 4-5, 2016-a Mizorama thli tleh, rial tla leh ruahsur vangin hriat theih chinah in 370 a chhia. Champhai district-ah in 343 a chhia a; Lunglei district-a Lungrang South khuaah in 19 a chhia a, Khojoysury-ah in pariat a chhe bawk.
Vanglaini palai zawhna chhanga Champhai DC Vanlalngaihsaka'n a sawi danin, Champhai district-a in chhe zat chu - Tualchéngah 160, Lungphunlianah 84, Selàmah 37, Hnahlanah 18, Mélbûkah 17, Khawbungah 10, Khuangthingah pakua, Zokhawtharah panga, Buangah pathum a ni a; a vaiin 343 a ni.
Champhai DC chuan, in chhe zingah hian biak-in, community hall leh sikulte pawh a tel tih sawiin, a zat chiah erawh an la hre chiang thei lo. Chhiatna tuarte chhawmdawlna tur sorkarin an ngaihtuah mek tih sawiin, "Aizawl aṭangin silpauline kan chah a, vawiin (Nilaini) hian 300 vel an rawn thawn chho a, a rawn thlen veleh, zaninah pawh chhiatna tuartute hnenah sem a ni ang," a ti.
Champhai district-a khuarel chhiatna tâwkte hi vawiin hian bialtu MLA TT Zothansanga, parliamentary secretary-in tlawh kual a tum.
Thu dawn danin, Champhai district-a in chhiate zinga a tam ber chu rialin in chung a den chhiatte a ni a; rial tla hi a lian hlawm hle.
Lungphunlian leh Hnahlanah chuan in bâkah, an grape-te pawh a deng chhe nasa a; Lungphunliana hian in luah zui theih rih loa chhiate chu sikul leh hall-ahte riahtir an ni.
Lunglei district-a Lungrang 'S' khuaah chuan Thawhlehni zan dar 11:30 vela thli, ruah leh rial thawkin chenna in 15, biak-in pahnih, community hall leh Seventhday Adventist Kohhran sikulte luah tlak lohin a tichhiaa thu dawn a ni.
Lungrang 'S' YMA hruaitute sawi danin, an khuaa UPC (Mizoram) biak-in chu a bang leh a chung kilh zawmna chhiain, a tlu sawp a, a chhunga bungrua -
ṭhutthleng, pulpit leh thil dangte pawh a chhe deuh vek a ni. BCM Nazareth biak-in, community hall leh Seventhday Adventist Kohhran sikulte chu thliin a chung a lên phawh vek bakah, a bangte a chhe deuh vek bawk.
Lungrang 'S' khawtlang chuan nimin khan in chhiate senghawi hna an thawk a; luah tlak loh khawpa in chhia neitute chen lailâwkna tur an ngaihtuahsak a ni.
Tlabung aṭanga km. 26 vela hla, Khojoysury khuaah pawh Thawhlehni zan khan thliin chênna in pariat a tichhia a, in chhiate chu Old Khojoysury leh New Khojoysury-ah chhungkaw pali ve ve chênna in a ni. In chhe zinga paruk chu luah zui tlak lohin a awm a, pahnih erawh chu thawm ṭhat theih a ni thung.
Mizorama in chhe zat
Tualcheng 160
Lungphunlian 84
Selam 37
Hnahlan 18
Melbuk 17
Khawbung 10
Khuangthing 9
Zokhawthar 5
Buang 3
Lungrang 'S' 19
Khojoysury 8
Total 370