Delhi-a hmeichhe naupang hruaitua puh Mizo hmeichhe 2 police-in an man

Mizoram police-te chuan Mizo hmeichhe naupang pahnih, New Delhi-a hna thawk tura anga hruai thlatua puh hmeichhe pahnih chu New Delhi-ah an man a, nimin khan Aizawl Police Station an thlenpui.

Police thuchhuah tarlan danin, Mizo hmeichhe naupang Delhi-a hruai thlatute hi Lalhming-mawii (27) d/o Lian-thanga, Phai-ruangkai, tuna Noida Sector 44-a cheng mek leh S Zonunsangi (25) d/o S Duh-kima, Lunglei Electric Veng-te an ni.

S Zonunsangi hian Mizo hmeichhe naupang pahnih, kum 15 mi ve ve chu March 21-ah bus-in Aizawl aṭangin a chhuahpui a, Guwahati aṭangin March 23-ah Lalhmingmawii'n relin Delhi thleng a panpui a ni. Naupang pahnih hi Delhi-a spa leh massage parlour-a hna thawk turin an hruai thla niin police thuchhuah chuan a tarlang.

An inhruai thlak danah hian thil felhlel a awma hriat a nih avangin Aizawl Police Station-ah thubuai ziah luh niin, naupangte chhanchhuak turin police team tirh a ni a; March 31, 2016 khan naupangte chu zawng hmuin, him takin Aizawl thlenpui an ni a, thil awm dan chiang zawk hre turin an chhui zui mek.

Police thuchhuah chuan, tunlai hian spa, massage parlour leh beauty parlour-a hna thawh beisei vanga phai lam pan an awm nuala a lan thu tarlangin, "Hna dik leh felfai tam tak karah thil dik lo thleng thei a awm fo avangin, mipuite fimkhur lehzual turin kan inchah a, an duh vâng reng pawh ni se, naupang kumtlinglo, an nu leh pate emaw, chhungte remtihna loa hruai hran hi danin a phal loh leh case neih theihna a ni," an ti a; Mizo mipuite fimkhur turin an chah.