KHAWTHLIR

April 14 chawlh

Mizoram Governor chuan Negotiable Instrument Act, 1881 tlawhchhanin April 14, 2016, Ningani chu sorkar chawlhah a puang. April 14 hi India danpui duannaa sulsutu Dr BR Ambedkar pian champha a ni a; chawlh puan hian sorkar hnuaia office, bank leh zirna-in zawng zawng a huam a ni.

Minister-in kan

March 9, 2016-a ram kâng vennaa hliam, Lalduha (66), Tlungvel chu nimin khan Environment & Forest minister Lalrinmawia Ralte-in Synod Hospital-ah a kan a, ṭanpuina Rs. 50,000 a hlan. Larinmawia Ralte chuan, Mizorama thing leh maute leh nungchate humhalh duh vanga hmanrua pawh nei lo chunga kâng a ṭhelh vanga hliam Lalduha inpekna chu a fakawm a tih thu a sawi.

Cabin block hawng

Christian Hospital, Lawngtlaia cabin block siam thar chu nimin khan BCM AGS i/c Service Rev. Lalbiaksanga Chinzah-in a hawng. Cabin block thar hi cheng nuai 30 sênga siam a ni a; cabin pahnih, deluxe room pahnih, staff sick room pakhat leh nursing station pakhat a awm.

Group YMA conf.

Sertlang Group YMA chuan April 5, 2016
aṭang khan South Lungdai community hall-ah conference an hmang a, nimin khan Chalrosanga Ralte, MLA-in a hman pui. Chalrosanga chuan Sertlang Group YMA hnenah leh South Lungdai branch YMA hnenah Rs. 15,000 ve ve a pe a ni.

NHRC member lo zin

National Human Rights Commission member, Justice Cyriac Joseph chu nimin khan Aizawl a lo thleng a; vawiina Mizoram University-a 'Protection of human rights and assuring the unity and integrity of the nation' tih thupui hmanga seminar buatsaihah khuallian a ni ang.

Hri danna sawiho

Lunglei District Task Force For Immunization chuan, Thawhleni khan DC Abhijit Vijay Chaudhari hoin zengri danna pek beihpui thlak dan tur an sawiho.