MADC-a thawkte'n mass casual leave la

Mara Autonomous District Council (MADC)-a thawk mi 1,800 vel chuan 6th. Pay arrear pe thuai tura MADC hotute phût nan nimin aṭang khan ni thum awh turin mass casual leave an la ṭan a; vawiin leh naktukah an chhunzawm leh ang.

Saiha aṭanga thu dawn danin, MADC-a thawkte'n mass casual leave an lak avang hian nimin khan MADC Office a ruak deuh vek a, thawktu kal an awm lo.

MADC thawk inzawmkhawm, MADC Employees Federation hruaitute chuan, an thil phût chu nimin aṭanga chhiara ni thum chhunga ngaihtuah a nih loh emaw, chhànna lawmawm an hmuh loh emaw chuan an thil phût a hlawhtlin theih nan nasa zawka MADC sorkar nawr an tum thu an sawi.

MADC chief executive member RT Zachono chuan, MADC hnathawkte'n an thil phût nawrna atana mass casual leave ni thum chhung lak an tum chu dan kalh leh Supreme Court thuthlukna kalh niin a sawi.

CEM hian MADC-a thawkte chu vawiina pisa kai vek turin hriattirna a chhuah a, thu awih loa pisa kai duh lote chu Central Civil Service Conduct Rule anga hremna pek theih an nih thu a tarlang.

RT Zachono chuan, 6th. Pay rawtna Mizoram sorkarin a pawm hnuah kum 2006 leh 2010 inkar khan MADC sorkar hmasain 6th. Pay arrear 52% hnathawktute hnenah a pe tawh a, la pek loh chu 48% a nih thu a sawi a; MADC-in sumah harsatna nasa taka a tawh avangin pek theih la ni rih lo mah se, pek theih dan kawng zawn zui zel a nih thu a sawi bawk.

CEM sawi danin, MADC hian Central sorkar hnuaia NITI Ayog-in India ram chhunga local body-te Central Assistance a pek aṭangin untied fund cheng nuai 764 a dawng ve a, chu chu thawktute 6th. Pay arrear atan a pek theih leh theih loh Planning department zawhfiah a ni. Planning department chuan sum pek nachhan chu hmasawnna hna thawh nan a ni tih a sawi avangin, sum chu arrear atan hman theih a ni lo.

RT Zachono chuan, 6th. Pay arrear la pek loh 48% zinga 20% chu a pek theih dan kawng zawn mek a nih thu a sawi a; mahse, MADC-a thawktu lungawi lote High Court-ah an kal avangin, thubuai hnuhkir a nih loh chuan tun dinhmunah thil tih theih a awm lo niin a sawi bawk.

Thu dawn danin, MADC-ah hian thawktu 1,800 vel an awm a, chu'ng zinga mi 1,580 chu 6th. Pay arrear phûttute an ni.