Sorkarin Tlawng lei dawh ṭhat tur a sawifiah

Mizoram sorkar chuan thuchhuah siamin, Sihhmui leh Lengpui inkara Tlawng lei chim dawh ṭhatna tura sorkar hmalak dan a sawifiah a; Tlawng lei chu hmanhmawh taka dawh ṭhat leh a nih theih nan PWD-in a theih ang angin hma a la mek tih a tarlang.

Sorkar thuchhuah tarlan danin, December 2, 2015-a Tlawng lei chim dawh ṭhatna turin Ministry of Road Transports & Highways (MoRTH)-in April 30, 2015-ah cheng nuai 297.26 a pe chhuak a; december 8, 2016-ah bailey bridge hmanruate supply turin Garden Reach Ship Builders and Engineers Ltd. (GRSE), Kolkata chu supply pek a ni.

GRSE chuan December 29, 2015-ah hmun dang aṭangin order tam tham tak an dawn avangin, March 2016 hma chuan supply an buaipui theih dawn loh thu Mizoram sorkar a hriattir a, chuvang chuan supply hma thei tur zawn niin, Shiba Industries, Kolkata biak a ni a, anni chuan payment pek aṭanga ni 45 chhunga an supply theih tur thu an sawi. Shiba Industries chu December 30, 2016-ah supply order pek a ni.

Shiba Industries chuan January 14, 2016-ah supply bill pek a nih theih nan Bank Guarantee (BG) cheng nuai 187 leh proforma bill chu e-mail-in PWD EE (National Highway Division-l)-ah an thehlut a, chumi ni vek chuan bank aṭangin confirmation lak nghal a ni.

Bill chu January 18-ah MoRTH Regional Officer, Guwahati-ah payment pe turin thawn a ni a, mahse, RO office chuan kum 2015-16 chhung atan fund a awm tawh lo a, March 2016-ah chauh an pek theih tur thuin a lo chhang a ni. Payment chu March 5, 2016-ah pek a ni ta chauh a; mahse, payment an pekah Excise Duty leh CST an pek tel loh avangin, bungrua phurh chhuah theih a ni lo a, March 14-ah an release thei chauh a ni.

Sorkar thuchhuah chuan, "Tunah hian lei dawh lehna tur hmanruate phurh ṭan mek a ni a, company-in April 10-12, 2016 hian min pe fel hman turin an inbuatsaih a ni," a ti. Bailey bridge bula RCC lei thar dawh tur atana consultant rawih tur pawh MoRTH-in a pawm tawh a, tunkar chhunga enfiah an tum thu a tarlang bawk.