ZNP-in PMFBY lawmawm an ti

Zoram Nationalist Party (ZNP) chuan thu-chhuah siamin, sorkar laipuiin 'thlai luman’ scheme thar, ‘Prime Minister Crop Insurance Scheme’ (Pradhan Mantri Fasal Bima Yojana) a siam thar chu lawmawm an tih thu an tarlang.

ZNP chuan, thlai luman siam chu an party-in kum tam tak chhung an lo aupui tawh a ni tih sawiin, "Kut hnathawktute’n khuarêl chhiatna emaw, an thlai thar chhuah hralhna tur a awm loh pawha an indawmkun mai lohna tur, Pradhan Mantri Fasal Bima Yojana, January 13, 2016-a Union Cabinet-in a pawm tihhlawhtling tura hmalak mek a ni hi lawmawm kan ti a. Sorkar laipui scheme thar hi chhawr ṭangkai ve turin Mizoram sorkar hi lo inhmakhua nachang hre turin kan duh," an ti.

Mizoramah kum 40 chuang sorkar hrang hrang a din chhung-in political party dangte'n thlaiin luman a nei ngai lo tihte leh thlai thar leina budget-ah a dah theih loh titein mipui an bum tawh ṭhin nia sawiin, ZNP chuan, tunah chuan a theihzia a lang chiang ta niin an sawi.

ZNP chuan, kut hnathawktute’n a hralhna leh a man tur hre saa hna an thawh hun leh khuarel chhiatna a thlen pawha an thawh rah a lothlawna a luan ral mai loh hun an nghahhleh thu an sawi a; ZNP a sorkar a, policy a taka hman a nih hunah chuan sorkar chu ruling ta bik ni tawh loin, a taima apiangte dinchhuahtirtu leh mipui sorkar a nih tur thu an sawi bawk.