CAG-in lottery directorate enfiah Lottery firm-te zir chiang leh mek

8th April, 2016

Comptroller and Auditor General (CAG) chuan Mizoramin lottery a kalpui dan a zir chian mekah Institutional Finance & State Lottery (IF&SL) directorate chu a zir chiang zo tawh a; lottery kalpuitu firm-te an zir chiang leh mek.

Ministry of Home Affairs chuan CAG chu Mizorama sorkarin lottery a kalpui dan chhui turin a hriattir a; Mizo-ram rualin hian West Bengal, Sikkim leh Nagaland-te chhui turin a ti bawk. An state-a CAG ṭheuhin lottery kalpui dan chu an chhui chiang a ni.

Vanglaini thu dawn danin, CAG hian kumin kum tir aṭang-in Mizoramin lottery a kalpui dan hi zir chiang ṭan a; IFSL Directorate chu an thil hriat duhte an zawt a, an zâwt zo thawkhat tawh.

CAG hian an zir chian-na hi Ministry of Home Affairs-ah an thawn ang a, MHA lamin hriat belh duh an neih chuan IFSL Directorate chu an zawtfiah leh ang.

Hetih lai hian, CAG chuan Mizoram lottery kalpuitu firm palite an zir chiang leh mek a, an la zo lo deuh.

Mumbai, Bangalore leh Delhi vela firm-te warehouse, ticket zawrh dan leh an head office-te chu IFSL Directorate hotute nen tlawhin an enfiah zo thawkhat tawh a ni.

Tunah hian West Ben-gal-a lottery kalpuitu firm ware-house, head office leh ticket an zawrh dante an enfiah leh dawn a, CAG aiawh leh IFSL Direc-torate hotute an kal leh ang.

Thu dawn danin, Kerala leh Kolkata-a mite'n lottery kalpui danah dik lo a awm nia hriain, Calcutta High Court-ah public interest litigation (PIL) an thehlut a; chumi kal zelah chuan MHA chuan Kolkata-a lottery ticket hralh ṭhin - Mizoram, Nagaland, Sikkim leh West Bengal sorkarte'n lottery an kalpui dan endik turin CAG a hriattir a ni.

PIL-ah hian lottery ticket hralh danah thil dik tâwk lo a awm thu te, rules & regulation zawm a nih loh thute leh thil dang hrang hrang tarlan a ni.

PIL thehluh chungchangah hian Mizoram sorkar chuan Calcutta High Court-ah insawifiahna a thawn tawh a; dik lo awm se chuan insawifiahna a thawn tawhah hian complaint an dawn tur thu leh, complaint an la dawn ngai loh thute an tarlang.