World Health Day hmang

Nimin khan World Health Day a ni a, Mizoram hmun hrang hrangah hman a ni.

Sorkar damdawi-in hrang hrangah zunthlum chung-changah a thlawna inentirna buatsaih a ni a, mi 452-in blood sugar sang an nei tih hmuhchhuah a ni.

World Health Day pual hian Aizawlah chuan Aizawl Civil Hospital auditorium-ah inkhawm buatsaih niin, Health Services joint director Dr F Lianhlira'n a kaihruai a; Non Communicable Disease (NCD)-a state nodal officer Dr Eric Zomawia'n World Health Day 2016 thupui, 'Zunthlum lakah inveng la, inenkawl la, hneh rawh' tih a sawi.

Dr Eric Zomawia chuan, zunthlum chu khawvela mihring suattu natna langsar tak a nih thu sawiin, kum 1980-ah khawvela mi nuai 1,080-in zunthlum an veia chhût a nih laiin, kum 2014-ah chuan mi nuai 4,220-in an vei tawh tih a sawi a, "Kum tin mi nuai 18-in an thih phah a ni," a ti.

NCD Nodal Officer chuan, zunthlumin taksa a khawih pawi hle tih sawiin, "Thluak, thisen zám, kal leh lung bakah taksa pêng pawimawh lai a khawih ṭhin avangin kan ngaihthah tur a ni lo," a ti a; zunthlum laka inveng turin kea kal tam leh insawizawi ṭhat te, thei leh thlai hring ei tam leh mawm lam ei tam lohte a ṭul thu a sawi.

Health department hnuaia NPCDCS huaihawtin Mizorama sorkar damdawi-in hrang hrangah a thlawna zunthlum enfiah leh blood pressure endikna buatsaih a ni. Nimina free diabetic test-ah hian hriat theih chinah mi 2,926 an inentir a, chu'ng zinga mi 452 chuan blood sugar sang an nei tih hmuhchhuah a nih bakah, mi 451-in BP sang an nei tih hmuhchhuah a ni.