KHAWTHLIR

Award dawng dawn UD&PA leh YMA ṭangkawpa bawlhhlawh lak khawm dan ziahna, 'Law Cost Sanitation Solution' chu HUDCO-in an zir chian hnuaah HUDCO Award for Best Practices to Improve the Living Environment 2015-16 hnuaiah UD&PA leh YMA chu lawmman dawng tura thlan a nih thu sorkar thuchhuah chuan a tarlang.

Hrem phût

Chanmari West branch YMA chuan, an member K Lalhmunsiama, Postal department leh a thawhpui March 31, 2015 zana Lungleia an dâk la haw lam misualin an sawisak rawn chu pawi an tih thu an tarlang a; misualte chu mana hrem ngei turin thuneitute an phût.

Infuih thar

AH&Vety department chuan nimin khan Polyclinic conference hall-ah kum 2016-17-a an hma-chhawpte an tihhlawh-tlin theihna atan infuih tharna hun an hmang a; artui leh bawnghnutea a intodelh theihna atan nasa zawka ṭan lak an tum a ni.

Mei zu man

Lawngtlai District Anti-Tobacco Squad chuan nimin khan Lawngtlaia vantlang hmun hrang hranga phal lohna hmuna mei zu mi paruk an man.

UPC Conference

UPC (North East India) chuan nizan khan Multipurpose Indoor Hall, Mualpuiah General Conference vawi 48-na an hmang ṭan a, Pathian-ni zanah a ṭiak ang. India hmarchhaka district 11 aṭangin palai an kal a, kum 2016-17 chhunga hruaitu tur an ruat ang.

Thawk ngawrh

National Highway-54, Lunglei-Tuipang inkar blacktopping hna ngawrh taka thawh mek a nih thu sorkar thuchhuah chuan a tarlang a, "Fûr ruahtui tlak hmain a thui thei ang ber thawh zawh hman tuma hma lak a ni," a ti.

In 12 chhia

April 6, 2016 zana ruahsur leh thli tleh vangin Tualbungah in pakua leh Dilkhanah in pathum a chhia. Chhiatna tâwk chhungkuate chu bialtu MLA Dr Ngurdingliana'n rangva bundle 13 leh khawtlang hnatlangte thingpui lumna senso atan Rs. 3,000 a pe.