Minister hoin kawng zauh dan tur thlirho

UDPA minister Zodintluanga hoin PWD, Power & Electricity, PHE, UDPA leh Aizawl Municipal Corporation hotute chuan, nimin khan Aizawl khawpuia veng pathuma intawh khawmna kawtthlêr hrang hrangte zauh theih a nih leh nih loh an en.

Kawng enfiahtute chuan, Chanmari West leh Vaivakawn inrìna, Hunthar pêng lai râwt hniam a, motor kawina lai tur zauh theih a nih leh nih loh te; Ramhlun, Chaltlang leh Edenthar Veng
aṭanga lirthei tlante intawh khawmna Bawngkawn traffic point bul zauh dan turte leh, Ramhlun North-a Industry Pêng zauh dan turte an en.

Bawngkawn traffic point bul chu a chhehvela ramte a neitute biaka sorkara an hlân thei nge thei lo tih te, sorkarin a ṭul chuan dan hmangin acquire theih dan remchang emaw zawn theih a nih chuan Bawngkawna motor intawh khawmna chu a zau lehzuak thei dawn tih tarlan a ni.

Zodintluanga chuan, Aizawl khawpuiah kum tin mipui an pung zel tih sawiin, "Thingtlang aia khawpuia mipui chen tamna state kan ni. Kan khawpuite hi mumal zawka enkawl chhoh a, veivahna nuam tak kan siam a ngai. Chumi thlentir thei tur chuan sorkar department hrang hrangte'n mahni department bil ngaihtuah loa mipui tana thawk kan nih hriain, theihtawp kan chhuah tlân a ngai," a ti.

AMC deputy mayor Lalringliana chuan, Aizawl khawpui tâwt zelah leh lirthei pung zelah Bawngkawn traffic point bul chu motor inkalpawh leh intawh harsa tak a nih avangin siam zau theih a nih chuan AMC lam aṭangin theihtawp an chhuah tur thu a sawi.

PWD engineer-in-chief Van-laltluanga chuan, an hmun enhote chu PWD-in uluk taka zir chiangin, plan leh drawing mumal tak an siam tur thu a sawi.