Kuhva tawlhrûka FIR lut ziah luh loh chhan sawifiah turin Court-in a hriattir

Gauhati High Court Aizawl Bench chuan, ram dang kuhva dan loa tawlhrûk chung­changa December 29, 2021-a Champhai Police Station-a FIR thehluhah thubuai ziah luh a nih loh chhan sawifiah turin a hriattir a; kuhva rah tawlhrûk chungchang chu chhui ṭha leh turin sorkar a hriattir bawk.

Ram dang kuhva rah tawlhrûk chungchangah hian Vanramchhuangi, Chaltlang chuan December 29, 2021 khan Champhai PS-ah first information report a thehlut a; April 29, 2022-ah Gauhati High Court Aizawl Bench-ah Public Interest Litigation (PIL) a thehlut leh bawk.

PIL chungchang hi Gauhati High Court judge pahnih - Justice Michael Zothankhuma leh Justice Marli Vankung te chuan January 22, 2024 khan an ngaihtuah a; PIL thehluttu aiawhin ukil C Lalfakzuala a ding.

High Court thuchhuaka a lan danin, December 29, 2021-a FIR thehluh chu Champhai PS-ah ziah luh (register) a nih loh avangin High Court chuan hearing neih leh hunah Champhai PS-a FIR ziah luh a nih loh chhan sawifiah turin a hriattir a; Champhai PS officer in-charge-in preliminary enquiry a tih tawhna chu Court-ah thehlut turin a hriattir bawk.

Affidavit thehluhah chuan, FIR chu police-in cognizable offence-ah an ngaih loh avangin chief judicial magistrate-ah chhui phalna an dil a, mahse, police-in preliminary enquiry pawh an tih loh avangin CJM chuan chhui phalna a pe lo.

High Court chuan, kuhva rah tawlh rûk chungchang chu chhui ṭha leh turin Mizoram sorkar a hriattir a; state sorkarin a duh a nih chuan a chhui hna chu CBI hnenah a hlan thei tih a tarlang.

Court thuchhuaka a lan danin, Assistant Commissioner, CGST (Central), Khatla, Aizawlin January 18, 2024-a affidavit a thehluhah chuan, Mizoram sorkar leh GST (Central) Commissioner ten Champhai district aṭanga district danga kuhva rah phurh chhuahna turin e-way bill an tichhuak a, chumi ang chuan kuhva rah aṭangin GST lâk a ni.

Kum 2021-22 chhung khan Mizoram sorkarin kuhva rah phurh kualna atana e-way bill a tihchhuaha kuhva rah hlut zawng chu Rs 1,02,81,05,030 (nuai 10,281.05) a ni a; chumi kum vêka GST Commissioner-in e-way bill a tihchhuaha kuhva rah hlut zawng chu Rs 37,85,83,260 (nuai 3,785.83) a ni.

Kum 2022-23 chhunga kuhva rah phurh kualna tura Mizoram sorkarin e-way bill a tihchhuaha kuhva rah hlut zawng chu Rs 1,34,78,52,630 a ni a, GST (Central) Commissioner-in e-way bill a tihchhuaha kuhva rah hlut zawng chu Rs 32,27,93,124 a ni.

Sorkar kum kal mek, 2023-2024 chhunga kuhva rah phurh kualna tura Mizoram sorkarin e-way bill a tihchhuaha kuhva rah hlut zawng chu Rs 13,60,41,994 leh GST (Central) Commissioner-in e-way bill a tihchhuaha kuhva rah hlut zawng chu Rs 16,11,58,793 a ni bawk.

Assistant Commissioner, Customs (Preventive) Division-in July 13, 2022-a affidavit a thehluha tarlan danin, Mizoram sorkara Horticulture department-in kum 2019-20 chhunga Mizorama kuhva thar chhuah zat chu metric ton 33,540 a ni a, chu'ng zingah chuan Champhai district-a thar chhuah a tel lo.

Home department aiawha affidavit thehluttu Under Secretary-in January 17, 2023-a a thehluha a tarlan danin, Champhai district leh Khawzawl district-ah kum 2021 leh 2022-ah kuhva phun ṭan a ni a, mahse, tun thlengin kuhva rah thar a la ni lo.