February-ah Aizawl Day lawm dawn

Aizawl Municipal Corporation (AMC) mayor Lalrinenga Sailo chuan, kumina Aizawl Day, February 25 chu February 21-24, 2024 chhungin an lawm dawn tih a sawi a; Aizawl Day lawmnaah tel vek turin Aizawl mipui a sáwm.

Mayor Lalrinenga Sailo hian nimin khan a pisaah thuthar thehdarhtute kâwmin, Aizawl Day vawi 135-na lawmna atana thil an buatsaih tur hrang hrang a tarlang a; chu'ngte chu - Walkathon, Faina Hnatlangpui, Mayor's Cup Volleyball Competition, Exhibition cum Stall, Concert, Cosplay, Carnival-te a ni.

Kumin hi AMC bultuma Aizawl Day lawm vawi hnihna tur a ni a, Organising Committee din niin; chairman chu executive corporator Laltlanzova Khiangte, vice chairman chu AMC commissioner Lalhriatpuia, secretary John Zosangliana, corporator leh treasurer chu assistant commissioner Vanlalruata te an ni. Member-ah corporator-te leh AMC official mi 11-te an awm bawk.

Aizawl Mayor chuan, Aizawl Day hi Aizawl mipui tana AMC luan chhuahna a ni tih sawiin, "Programme hrang hrangte tihlawhtling tur leh a neitu nihna rilru púa Aizawl Day lawmnaa tel vek turin Aizawl mipuite thinlung takin kan sáwm vek a ni," a ti.

Organising Committee chairman Laltlanzova Khiangte chuan, kumina Aizawl Day lawmna atan cheng nuai 30 ruahman a nih thu sawiin, nikuma sum hman zat zatve chauh a nih avangin nikuma Aizawl Day lawmna atana an tih eng emaw zat chu kuminah chuan tih a ni dawn tawh lo tih a sawi.

Corporator Chuauzikpuii chuan, Lammuala exhibition stall an siamah thil zuar tláwm theite an duhsak dawn thu leh, hriselna lama ràwn tur doctor-te an ṭhut dawn thu a sawi a; naupang infiamna hmun an buatsaihah luh man leh infiam man an lâk dawn loh thu a sawi bawk.

AIZAWL DAY LAWMNA TURTE

1. WALKATHON: February 21, Nilaini zing dar 6.30-ah neih a ni dawn a, AMC ward tin aṭangin mi 30 tel tura beisei ni a, Aizawl deputy mayor R Thanglura'n Lammualah Aizawl Day lawmna a hawng nghal ang.

2. VOLLEYBALL: Volleyball hmangin Mayor's Cup buatsaih a ni dawn a, February 16-ah ṭan a ni ang. AMC ward inelna a ni dawn a, ward tin aṭangin mipa leh hmeichhia awm tura beisei a ni a, lawmman ṭha tak siam a ni dawn.

3. LAMMUAL: February 21-24 chhungin Lammualah thil chi hrang hrang buatsaih a ni dawn. Exhibition buatsaih a ni dawn a, stall 60 a awm ang. Cosplay, carnival leh bouncing castle-te a awm dawn a; February 24-ah concert buatsaih a ni ang.

4. HNATLANG: February 24-ah faina hnatlangpui huaihawt a ni dawn a; corporator leh local council-te chu an huam chhung ṭheuhah faina hnatlang huaihawt tura beisei an ni.

5. AWARD: Aizawla chêng upa ber hnenah February 24-ah chawimawina hlan tur a ni a, pawisa a keng tel.