Bangladesh-ah Mizoram sawhthing leh aieng mamawhna a sáng - Bangladesh HC

Delhi-a Bangladesh high commissioner Mustafizur Rahman chuan, Mizoram thlai thar zingah sawhthing leh aieng chu Bangladesh-ah mamawhna a san thu a sawi.

Bangladesh High Commissioner hi January 23, 2024 khan Commerce & Industries minister F Rodingliana'n Bangladesh Embassy-ah a kâwm a, Mizoram leh Bangladesh insumdawn tawnna chungchang a sawipui. Rahman chuan, Mizoram thlai thar zingah sawhthing leh aieng chu Bangladesh-ah mamawhna a san thu a lo hrilh a ni.

F Rodingliana chuan, kum 2022-a Mizoram leh Bangladesh insumdawn tawnna tur inremna ziah tawh chu mamawhte buatsaih mumal a nih loh avangin tun thlengin kalpui theih a nih loh thu a sawi a, "A hmasa berah inkalpawhna ṭha, khawmual leh luiah siam a pawimawh a, Mizoram lam chuan inkalpawhna kawng siam turin hma kan la mek," a ti a, Bangladesh lam pawhin hma la chak ve a duh thu a sawi.

Mustafizur Rahman chuan, Minister thusawi a ṭâwmpui thu sawiin, "Mizoram leh Bangladesh insumdawn tawnna tura ruahmanna awm sate tihlawhtling turin Ministry of External Affairs an pawimawh a, nasa lehzuala nawr chêt a ngai," a ti.

Bangladesh High Commissioner hian Mizorama zin a châk thu a sawi a, F Rodingliana hian Chapchar Kût hmanga zin turin a sáwm a ni.