Saa intodelh turin ran chawa intodelh hmasak a ngai - Vety Minister

Animal Husbandry and Veterinary minister C Lalsawivunga chuan nimin khan Tanhrila Animal Feed Plant leh ZPDS INBRO Poultry Hatchery Farm-te a tlawh a; saa intodelh turin ran chawa intodelh hmasak a ngaih thu a sawi.

C Lalsawivunga chuan, "Saa intodelh tur chuan ran chawa kan intodelh hmasak a ngai a, chuvang chuan ran chaw siam chhuah nan mipuiah ran chaw siamna atana mamawh vaimím, bekang leh a dangte thar tam tura ṭan lak a ngai," a ti.

Animal Feed Plant tlawhnaah khawl hnathawh leh ran chaw siam chhuah dante a enkawltu Dr V Lalzarzova'n Minister a hrilhfiah. Feed Mill hi Mizorama ran chaw man sang lutuk tur vèn nan leh mipuiin ran chaw ṭha leh man tlawm zawka an lei theihna tura buatsaih a nih thu te, tunah ni tin quintal 100 a pek chhuah ṭhin thute AH&Vety hotute chuan an tarlang.

ZPDS Hatchery tlawhnaah managing director Dr Ngursailova'n hnathawh dante a sawifiah. Farm hi kum 1987-ah Regional Broiler Chick Farm tia din a ni a, Mizorama broiler ar lak luhna hmasa a ni. Tunah chuan artê leh artui thar chhuah a ni a, chawlhkar khat chhungin ar notê 1,00,000 a keu thei a ni.

Minister C Lalsawivunga hian Lengpui rama Nucleus Boar Semen Station leh Feed Plant leh kudamte a tlawh bawk a; AH&Vety director Dr C Lalrintluanga leh officer dangte' an ṭawiawm a ni.