Phalna nei lo Assam Rifles sipaite Mizoramah an rawn lût tlang lui

Vairengte police-te aṭanga thu dawn danin, Mizorama luh tum Assam Rifles-te hi Vairengte checkgate-ah tihdin an ni a, Home department aṭanga phalna an neih loh avangin luh tlang phal an nih loh thu hrilh an ni. Aizawl aṭangin Home department hotute pawhin phone hmangin an be bawk. AR-te hian phalna nei lo mah se, an tlang tur thua chhángin, silai nen motor aṭangtein an zuangthla a ni.

Vairengte aṭanga thu dawn danin, AR-te hian kaltlang luih an tum avangin darkar khat vel chhung buaina a awm a, Home Secretary biakpawh a ni a, ani pawhin kaltlangtir lo turin Mizoram sorkar aṭanga duty-te a hrilh a ni. Checkgate-a hrui pawh thlahdul deuh a nih laiin an tlàn tlang lui a, police-te'n au zui mahse an ding lo.

Assam Rifles mi leh sate hian Rapid Antigen Test an paltlang lo a; thil thleng chungchang hi Kolasib DC pawh hriattir nghal a ni. Hetih lai hian, AR hotute chuan, Ministry of Home Affairs-in ram chhunga veivah phalna a pek thu Vanglaini palai an hrilh a, "Chutiang a ni chung chuan Mizoram sorkarin dan a siamte chu zawm ṭha kan ti a, phalna pawh kan dil a ni. Kan dilna hi Home department-in min chhàn loh avangin kan naute hi an rawn lut lui a ni. Covid-19 test pawh tih an duh vek a, mahse, an tihsak duh lo," an ti.

AR hotute chuan, mipui hriata puanzar chi si loh tih tur an ngah thu sawiin, "Myanmar leh India inrìna vengtu kan nih angin thil ṭul tam tak a awm. Chawlh làa awm mekte an rawn lêt loh chuan indaih lohna a nasa si a, chuvangin, kan inchah lut lo thei lo a ni," an ti a; state páwn aṭanga AR sipai rawn lut reng rengte chu Zokhawsanga an quarantine centre-ah an dah luh nghal zel thu an sawi a ni. Assam Rifles hotute sawi danin, nimina Vairengte aṭanga rawn lutte chu mi pariat an ni a, Zokhawsanga quarantine centre-ah dah nghal an ni. Covid-19 lakah an fihlim tih finfiah a nih hma chuan an duty-na turah an kal dawn lo.

Zokhawsangah hian uluk taka an inenkawl avangin AR sipaite'n Zokhawsang páwn lamah mi dangte hripui an la kài chhâwng lo niin an sawi. Mizoram sorkar chuan, Covid-19 avangin Home depart­ment aṭanga phalna nei lote chu Mizoramah luh a khap a, Mizoram lut turte chuan phalna an dil ṭhin a ni. August 3, 2020 khan chief secretary Lalnunmawia Chua­ungo-in CS conference hall-ah Mizorama sipai chi hrang hrang hotute a kâwm a, Covid-19 a darh zel lohna atana hmalak dan tur a sawipui. He meeting-ah hian, paramilitary force-te chu August 15, 2020 thleng Mizorama an luh khap rih an rêl a; August 15 a ral tawh a, a hnu lama kal dan tur sawi zui a ni tawh lo.

Nimina Assam Rifle thuchhuah tarlan danin, AR-te hian tun hnaiah Myanmar aṭanga rawn lut heroin cheng vbc. 1.8 man hu, methamphetamine cheng vbc. 11 man hu, kuhva rah cheng vbc. 6.7 man hu, thing hmarcha cheng nuai 43 man hu leh foreign cigarette cheng vbc. 2 man hu an man a ni.