CM hnenah sport hruaituten mamawh an thlen

Chief minister Lalduhoma chu nimin khan a pisaah Mizoram State Sports Council (MSSC), United Sports Association of Mizoram (USAM) leh Mizoram Olympic Association (MOA) hruaitute'n an kâwm a, an mamawhte an thlen.

CM Lalduhoma chuan, mamawh an thlente chu Sports Minister-in ṭha taka a bawhzui theih thu sawiin, "Sports Minister fel tak kan neih avangin in harsatnate hi ani'n ṭha takin a bawhzui thei ang tih ka hria a, amah kaltlanga engkim tih zel ka duh," a ti.

Central scheme hmanga infiamna hmunhma siam belh theih chi a awm chuan chak taka bawhzui an tum thu sawiin Lalduhoma chuan, "Sports Policy leh inrêlbàwlna dan tihdanglam deuh in duhte hi a ṭul ang zela hmalak theih a ni," a ti a; MSSC leh MOA-in hmunhma tur an dil chungchangah, hmun remchang lo melh a, a hnena thlen leh turin a chah.

Sports hruaitute hian Chief Minister hnenah lawmpuina hlanin, Sports Minister ṭha tak a pek avangin lawmthu an hrilh a; Mizorama infiamnain hma a sawn zelna tura pawimawh nia an hriatte an thlen zingah Sports department leh MSSC budget tihpun te, MSSC leh MOA puala in hran neih te, Mizoram State Games buatsaihte a tel a ni.