Dan loa thil tawlh rûk chungchangah MPSOA-in CM leh HM an thláwp

Mizoram Police Subordinate Officers’ Association (MPSOA) hruaitute chuan January 23, Thawhlehni khan Home minister K Sapdanga a pisaah an kâwm a; dan loa thil tawlh rûk chungchanga Chief Minister leh Home Minister hmalakna chu 100%-a an thlàwp thu an sawi.

MPSOA hruaitute hian an nihphung leh service chungchanga an pawl hmalaknate hrilhin, an hmachhawp hrang hrangah hma lakpui turin Home Minister an ngen a; an thupui (motto) chu 'Dikna humhalh' tih a nih thu sawiin, dan loa thil tawlh rûk chungchanga Chief Minister leh Home Minister hmalakna chu 100%-a an thlàwp thu an sawi a ni.

MPSOA hruaitute chuan, "Kum thar tìr thla chanve pawh a ral hmain heroin cheng 31 hû leh kuhva rah ip 624 lai Mizoram hmun hrang hrangah police-te'n kan man thei hi lawmawm kan ti hle. Dan loa sumdawnnate titawp tura Home Minister hmalakna ṭha kan ti a, ram siamṭhatna turah Mizo mipui leh NGO hrang hrang hruaitute ṭawiawmna kan ngen a ni," an ti.

January 13, 2024 zana Champhai Khankawn Police Check Gate-a duty officer (IO) anga insawi a, sorkar tihmingchhe zawng leh police hmél tibâl thei zawnga whatsapp thu (message) darh vak chu an zir chian thu tarlangin MPSOA chuan, "Khami zana duty officer iráwm chhuak a nih loh thu chiang takin kan hria. Hetianga thu dik lo post-tu hi dan anga hremna pek ngei ni se kan ti. Dikna humhalh turin theihtawp kan chhuah zel dawn," an ti a; smuggler-te leh mi huamhauh tlemtê vanga police hmai tihbalh an phal ngai dawn lo tih an tarlang.

MPSOA chuan, Mizoram Police-te chu thurûk vawn kawngah rinawm tur leh social media hman danah pawh fimkhur leh zual turin an chah bawk.

MPSOA hi Home department hnuaia silai keng lo (un-armed police) zinga inspector chin hnuai lam insuihkhawm pawl niin, kum 1975-ah din a ni a; police unit hrang hrang 26 aṭangin member 4,000 chuang an tel a ni.