Minister-in sorkar laipui hotute a dawr

Minister of state Lalnghinglova Hmar chuan January 23, Thawhlehni khan New Delhi-ah department a enkawl pahnih - Sports & Youth Services leh Labour Employment Skill Development and Entrepreneurship (LESDE) kaihhnawih sorkar laipui hotute a kâwm.

LESDE minister Lalnghinglova Hmar hian Ministry of Tribal Affairs secretary Vibhu Nayar hnenah Ministry of Tribal Affairs chu tribal-te tana ding a nih angin he mi hnuaia Mizoramin hamṭhatna a neih dante a sawipui.

Vibhu Nayar chuan, Mizoram leh tribal tamna state tana an pek theih hrang hrang a sawi a; chu'ng thilte chang thei tur chuan hna thawh tawhna utilisation certificate neih ṭhat a ṭul thu te, hnathawh ṭha a pawimawh thu leh hna hmasain a hnunga mite a nghawng theih avangin fimkhur a ṭul thute a sawi.

Lalnghinglova Hmar chuan, ZPM kaihhruai Mizoram sorkar hnuaiah dik leh ṭha taka hna thawh tuma an inbuatsaih dante a sawi ve bawk.

SYS minister Lalnghinglova Hmar hian Ministry of Sports secretary Sujata Chaturvedi pawh kâwmin, Mizoram sorkarin infiamna lama hma thar lak a tum dan te, an tum tihlawhtling turin Mizoramin sorkar laipui puihna a mamawh thute a hrilh a, "Sorkar laipui aṭanga puihna awm angte kan dawng zel a nih chuan a lo thlàwna luang ral loin, infiamna lamah Mizoramin hmasawnna a neih belh zel thei ang," a ti.

Union Sports Secretary chuan, Mizoramin mamawh an thlen tawh, ama office-a chámbáng a awm a nih chuan zawng chhuak tur leh kal-tlangpui a nih tur thu Minister a hrilh a; Mizoram sorkar ngaih pawimawh zawngte ziaka thlen turin a ngen nghal.

Mizoramah India ram pum huap infiamna lama inràwnkhawmna buatsaih a duh thu Sports Minister-in a sawi chungchangah Sujata Chaturvedi chuan, sorkar laipui puihnaa tihhlawhtlin a nih tur thu a hrilh a; Mizorama infiamna pawl hrang hrangte vil ngun tura ruahmanna awm chu ṭha a tih thu leh naupang aṭanga infiamna kalpui tura sikulah infiamna uar ṭha a tih thu a sawi bawk.

Lalnghinglova Hmar chuan, India ramin kum 2036 Olympics thlen a tum chu lawmawm a tih thu a sawi a; Mizoramin infiammi a thawh ve ngei theih nan a hma thei anga ruahmanna siam an tum thu leh chumi atan chuan Sports Ministry puihna an mamawh tur thu a hrilh a ni.