MYC Chairman leh USAID inkâwm

Mizoram Youth Commission (MYC) chairman Malsawmzuala Ralte chuan January 23, Thawhlehni khan Hotel Regency-ah United States Agency International Development (USAID) hnuaia Health System Strenghtening Division, New Delhi hotute a kâwm a; Mizo ṭhalaite tana thawhho theihna turte a sawipui.

Malsawmzuala Ralte chuan, Mizo ṭhalaite chu pianpui finna leh thiamna lamah an sang a, mahse, hun remchang leh hmun remchang an neih loh avangin an theihna angte hmang thei lo an nih thu a sawi a, "Mizo ṭhalai ṭanpui ngai ṭhenkhat, ruihhlo bâwiha awmte chhanchhuah nan enkawlna changtlung leh felfai tak awm thei se. Hna thawk thei ṭhalai awm tamnaah hnathawh tur mumal a awm lo hi thil inhmeh lo tak a ni," a ti.

USAID hotute chuan, an theih ang anga puih an inhuam thu leh Mizoram sorkarin ṭhalaite enkawl tur bika MYC a siam chu ṭha an tih thu an sawi. Hriselna lam leh zirna lama thawhho theihna turte an sawiho nghal a ni.