Lawngtlai dist-ah JJM 98.02% kalpui tawh

Lawngtlai district bawrhsap Cheemala Siva Gopal Reddy kaihhruaiin nimin khan a pisaah Lawngtlai district-a Jal Jeevan Mission leh Swachha Bharat Mission hnuaia hmalaknate thlir lêt a ni a; JJM hnuaiah in tina tui herh hawna tura hmalakna 98.02% zawh a nih tawh thu tarlan a ni.

Cheemala Siva Gopal Reddy chuan, in tina tui thianghlim herh haw theih tura Jal Jeevan Mission leh faina kawnga hmalakna Swachha Bharat Mission tihhlawhtlin chu sorkar laipuiin a ngaih pawimawh thu a sawi a, "Mission pahnih hnuaia la tihhlawhtlin loh leh hnufualna lai la awmte chu thawhhona ṭha tak hnuaiah rang taka hmalak ka duh," a ti.

Ṭhutkhawma tarlan danin, JJM hnuaiah Lawngtlai district-a chhungkaw 24,082 zinga 23,607 (98.02%) chu an inah tui thianghlim herh hawna (functional household tap connection) pek an ni tawh a, la pek loh chhungkua 475 an awm. Hmabak la awmte chu Chawngte Sub-Division-ah chhungah in 327 leh Lawngtlai Sub-Division chhungah in 148-te a ni.

Páwn lama inthiar awm lohna chungchanga hmalakna, open defecation free chungchangah Lawngtlai district chu ram dang aṭangin raltlân eng emaw zat awm rengna a nih avangin khaw hrang hrang vil uluk a pawimawh thu tarlan a ni a; vantlang inthiarna (community compost pit) leh soak pit siamna khua 108 chu ODF+ a hlan kai theih a nih thu tarlan a ni bawk.