KHAWTHLIR

Thisen pe

Aizawl City Traffic Police chuan Mizoram Police din champha vawi 52-na pualin nimin khan Civil Hospital, Aizawl blood bank-ah thisen pek an huaihawt a, traffic police pangain thisen an pe a ni.

Career Mela

Saituala Samagra Shiksha office chuan nimin khan Saitual Auditorium-ah sorkar leh Samagra hnuaia high school leh higher secondary school zirlaite pualin Career Mela an buatsaih a, district bawrhsap Dr Lalngura Tlau-in a hmanpui. Career Mela-ah hian sikul 16 aṭangin zirlai 178 an tel a, Saitual SP Pukharj Kamal-in zirlaite hmalam hun atana pawimawhte a sawi a ni.

Sarâng man

Mamit bazar leh a chhehvelah nimin khan Enforcement Team-te'n hman khat daih sarâng (plastic) hmang an awm leh awm loh an endik. Kawng sira thil zuar leh dawr neitu tam zawkte'n dan phal loh sarâng an hman loh laiin, sarâng hmang ṭhenkhat chu an mansak. Hman khat daih sarâng an man zat chu kg. 1.6 a ni.

Minister-te'n tlawh

Myanmar sipai thlawhtheihna Lengpui Airport-a January 23, Thawhlehnia chesual chu nimin khan deputy speaker Lalfamkima, minister of state pahnih B Lalchhanzova leh Lalnghinglova Hmar bakah, sorkar hotu dangte'n a hmunah an tlawh. Minister-te chuan, vanduaina thleng chu pawi an tih thu leh hliam tuarte an tawrhpui thu an sawi.

CM lawmpuina hlan

Chief minister Lalduhoma chu nimin khan a pisaah Myanmar-a Zomi Federal Union hruaitute'n lawmpuina thuchei leh Tedim puan an hlan. CM hi Flagship Health Workers' Association leh Mizoram Hindi Prachant Sabha hruaitute pawhin kâwmin, an harsatna tawhte an hrilh. ZPM, Aizawl Damveng Unit-in Chief Minister's Relief Fund atan Rs 10,000 an pe bawk.