Voters’ Day pualin intihsiak buatsaih

Lunglei District Election Office chuan National Voters’ Day thleng tur pualin January 23, Thawhlehni zan khan Lungleia ZONET Studio-ah college leh higher secondary school zirlaite pualin quiz competition an buatsaih. Nimin khan Champhaiah essay inziahsiak leh lemziak intihsiak an buatsaih a; Khawzawlah quiz buatsaih a ni bawk.

Lungleia National Voters’ Day Quiz chu district bawrhsap Ramdinliani'n a hmanpui a; Quiz thupui chu 'Representation of Peoples Act 1950, Registration of Electors Rules 1960, Election Commission of India & General Knowledge' tih a ni. Intihsiaka pakhatna HATIM-in Rs 10,000, pahnihna Lunglei College-in Rs 8,000 leh pathumna Mizoram Polytechnic-in Rs 7,000 an dawng.

National Voters’ Day pual hian nimin khan Champhai district-a high school leh higher secondary school zirlaite tan GM HSS-ah Essay Writing Competition leh Painting Competition buatsaih a ni a, thupui chu 'Nothing like voting, I vote for sure' tih a ni.

H/S zirlaite tana intihsiakah zirlai 100 an tel a, HSS zirlaite tana intihsiakah sikul panga aṭangin zirlai 25 an tel. Intihsiak hi Election Commission of India hnuaia Systematic Voters’ Education and Electoral Participation (SVEEP) kaltlanga buatsaih a ni.

Khawzawlah pawh Voters Day pualin Khawzawl DC Conference Hall-ah Quiz Competition buatsaih a ni a, Khawzawla sikul paruk an tel. Khawzawl HSS (Samagra Shiksha) pakhatna an ni a, Model H/S pahnihna an ni. EVM nihphung leh hman dante naupangte hrilhfiah nghal a ni bawk. Painting Competition leh Essay Competition result chu vawiinah puan a ni ang.

Vawiin January 25 hi Election Commission of India din ní a ni a, kum 2011 aṭang khan ECI din ni hi National Voters Day atan hman a ni.