District-ah National Voters Day hmang

Nimin khan district hrang hrangah National Voters Day vawi 14-na hman a ni a, Day puala intihsiak lawmmante sem a nih bakah, voter’s pledge sawi rual a ni hlawm. Kumina Voter's Day thupui chu 'Nothing like voting, I vote for sure' tih a ni.

National Voter's Day hi Lungleiah chuan Convention Centre-ah hman a ni a, election officer TT Beikhazi-in kaihruaiin, district election officer leh bawrhsap Ramdinliani khuallian a ni. Ramdinliani chuan, tunah chuan kum tin ṭum li - January 1, April 1, July 1 leh October 1-a kum 18 tling tharte'n ERO office-ah kalin electoral roll-ah inziah luh an dil theih tawh thu a sawi.

Lungleiah hian National Voters’ Day puala hian lemziak, thuziak leh quiz intihsiaka lawmmante sem a ni a; district chhung Assembly constituency tina booth level officer (BLO) thawk ṭha berte hnenah lawmman Rs 2,000 ṭheuh hlan a ni bawk.

Champhaiah chuan IPR Auditorium-ah Voter's Day hman a ni a, DEO James Lalrinchhana'n a hmanpui. Champhai district-a BLO thawk ṭhate hnenah chawimawina hlan a ni a, lemziak leh thuziak intihsiaka ti ṭhate hnenah lawmman sem a ni. Voter's Day thutiam sawi rual a ni a, election kaihhnawih quiz buatsaih a ni.

National Voters' Day hi Kolasib-ah chuan IPR Conference Hall-ah DEO John LT Sanga hoin hman a ni a, SVEEP nodal officer C Lalhruaitluanga, IPRO-in a kaihruai. AERO Gilbert Lalhlimpuia'n electoral roll-a inziah luh dan leh inthlan chungchanga hriat tur pawimawhte a sawi a, DEO kaihhruaiin thutiam sawi rual a ni. Intihsiaka lawmmante sem a ni al inthlan leh a kaihhnawih chungchangah On The Spot Quiz buatsaih a ni bawk.

Serchhipah chuan DC conference hall-ah National Voters' Day hman a ni a, DEO David Lalthantluanga'n a hmanpui. DEO chuan Mizoram Assembly inthlanpui hnuhnung berah Serchhip district-ah vote 84.78% a tlâk thu sawiin, vote tlak ṭhatna ber district a nih thu a sawi. Voters' Day puala HSS zirlairte tana essay inziahsiaka ti ṭhate hnenah lawmman hlan a ni.

Mamitah chuan DC Conference Hall-ah National Voters Day hman a ni a, DEO leh bawrhsap VL Remliana'n a hmanpui. Chief election commissioner Rajiv Kumar thuchah ngaihthlak a ni a, thutiam sawi rual a nhi bakah, HSS zirlaite tana lemziak leh thuziaka intihsiak lawmman leh BLO ti ṭha ber lawmmante sem a ni.

Saitualah pawh DC Conference Hall-ah National Voters’ Day hman a bni a, election officer Laldinfeli'n kaihruaiin, DEO Dr Lalngura Tlau-in thuchah a sawi. Saituala H/S leh HSS zirlaite puala lemziaka inelnaa ti ṭhate hnenah lawmman sem a ni.

Khawzawlah chuan DC Conference Hall-ah National Voters’ Day chu hman a ni a, DEO leh bawrhsap K Lalrohlua'n a hmanpui. Voters’ Day pualin thutiam sawi rual a ni a; zirlaite puala lemziak, thuziak leh quiz intihsiaka lawmmante sem a ni.

Hnahthialah pawh Hnahthial Higher Secondary School-ah National Voters’ Day hman a ni a, DEO Chuauhnuna'n a hmanpui. Voters’ Day puala Hnahthial H/S zirlaite tana buatsaih lemziak intihsiak leh Hnahthial HSS zirlaite tana thuziaka intihsiak lawmmante sem a ni a; South Tuipui constituency-a BLO ṭha bera thlan H Zavela, Ngharchhip BLO hnenah lawmman Rs 3,000 hlan a ni bawk.