LMC hotute'n thil pawimawhte an rêl

Lunglei Municipal Council (LMC) Executive Council chu nimin khan LMC chairman Lalzuithanga kaihhruaiin a pisaah an ṭhukhawm a, vice chairman K Lalrinawma, executive councillor Zorinsanga Hmar leh chief executive officer R Vanlalsawta te telin, thil chi hrang hrang an rêl.

LMC Executive Council chuan, LMC huam chhunga construction work zawng zawngah LMC hriattir tur chungchang an ngaihtuah a; a kaihhnawih department-te leh mipuite'n zau zawka an hriat theih nan ṭha taka puanzar ni se, an ti.

Chief Minister an hmuh huna thu thlen turte an sawiho a; chu'ng zingah chuan sum chungchang, LMC-in additional requirement cheng nuai 21.41 a dil leh property tax assessment lakna atana sum an dil Rs 9,93,600-te a tel. LMC-ah thawktu post siam belh, office hmunhma leh Lungleia sorkar hmunhma enkawl si loh chungchangte thlen an rél bawk.