Hnawk tifaitute hamṭhatna sawiho

January 24, Nilaini khan AMC Auditorium-ah hnawmhnawk tifaitu (safai karamcharis)-te hamṭhatna, 'The Prohibition of Employment as Manual Scavenger and their Rehabilitation Act, 2013' chungchang sawiho a ni a, National Commission for Sufai Karamcharis chairman M Venkatesan-in a telpui.

M Venkatesan chuan, prime minister Narendra Modi thuràwn angin hmarchhak state-a safai karamcharis-te harsatna hriat tuma Aizawla kal a nih thu sawiin, Aizawla hnawmhnawk tifaitu mi 146-te nen an inkâwm thei chu lawmawm a tih thu a sawi a; an ni khat hlawh chu daily minimum wages nen a inmil leh inmil loh te, employment provident fund (EPF) an neih leh neih lohte a zawt a, life/health insurance an neih a ṭul thu a sawi.

Sufai Karamcharis hmeichhe hamṭhatna bik ngaihtuahtu tur committee siam turin M Venkatesan chuan a chah a; an harsatnate Chief Minister leh Governor a hmuh huna a thlen chhàwn theih nan a hnenah ziaka thlen turin a hrilh bawk.

Sawihona hi Social Welfare, Tribal Affairs, Women & Child Development principal secretary KT Beicho-a'n a kaihruai a; UDPA department aiawhte'n an harsatnate an tarlang a, sawihona leh zawhna leh chhanna hun hman a ni.

NCSK Chairman hian zirna-in hrang hrang principal te, bank aiawhte leh faina lam enkawltu sorkar hotute a kâwm bawk.