Minister-in thawhrimna hmanga thiamna tihmasawn zel turin a fuih
Aizawl West College chuan nimin khan Vanapa Hall-ah Annual College Week vawi 31-na khârna hun an hmang a, minister of state Lalnghinglova Hmar-in a hmanpui. Minister chuan, zirlaite chu chawr chhuahna chhungkua vanga chhuanlam siam lo tur leh thawhrimna hmanga an thiamna tihmasawn zel turin a fuih.
Lalnghinglova Hmar chuan, Mizorama standard time chu ṭhenawm ramte aiin darkar khatin a tlai sa tih sawiin, "Zing kara hna tam tak thawk hman an awm laia mutna atana hun kan hman zel chuan kan inen lêt a ngai tak zet. Zirlaite zingah in thawh hma a, in taimak a ngai. Family background vanga chhuanlam siam loin, thawhrimna hmangin in thiamna tihmasawn zel ang che u," a ti.
Thingtlang aṭanga Aizawla lehkha zira awmte chu an nu leh pate'n lehkha zir tura a tih ang ngeia awm tura chahin Minister chuan, "Aizawla awm ringawt duh tâwk loin, thiamna tak tak zir chhuak ang che u. Zirlaite'n in zirlai bakah Mizoram history, geography leh politics-te hriat ve zel tum ang che u," a ti a; ṭawng chi hrang hrang, a bik takin English, Hindi leh Japanese ṭawngte eizawn theihna tur khawpa thiam tum turin a chah bawk.
Inkhawmah hian Aizawl West College principal Prof. C Lalthlengliana pawhin thu a sawi. Aizawl West College-ah hian zirlai 927, zirtirtu 33 leh non-teaching staff pakua an awm mek a ni.