Insenghawi turin 'last warning' pe

National Highway (NH)-54 kawngpui zauh hna thawh mekah Zobawk khuaa zangnadawmna dawng tawh zinga an in la ṭhiat lo mi 31-te chu nimin khan Lunglei district hotute'n insenghawi tura hriattirna hnuhnung ber (last warning) an pe a; court-in stay order a tichhuak a nih loh chuan an inte chu ṭhiahsak tur a nih thu an hrilh.

Lunglei District Competent Authority for Land Acquisition (CALA) aiawhin additional DC Donny Lalruatsanga leh settlement officer Vanlalrova te chuan nimin khan zangnadawmna dawng tawh, an in la ṭhiat lo Zobawk North-a mi 16 leh Zobawk South-a mi 15-te chu harsatna an neihte an zawtfiah a; January 25, 2024 thleng bâk hun an pek theih tawh loh tur thu an hrilh a ni.

NH-54 kawngpui siam hna thawktu NHIDCL chu Prime Minister Office chuan March 2024 ral hma ngeia hna thawk zo turin a hriattir tih sawiin CALA aiawhte chuan, "Hnathawktute'n hun bituk chhung ngeia hna an thawh zawh theih nan vawiinah emaw, naktukah emaw, in insenghawi a ṭul," an ti.