Sipaia ṭan tumte tan inbuatsaihna

Assam Rifles chuan Aizawlah sipai lâkna hmachhawn tura inbuatsaihna, Pre-Recruitment Rally an buatsaih ṭan a, ṭhalai mi 70 an tel.

Pre-Recruitment Rally hi AR Civic Action Programme hnuaia buatsaih niin, hlawm (batch) hniha kalpui a ni dawn a, January 22 khan ṭanin, February 17, 2024 thleng neih tum a ni. Mizoram ṭhalai mi 70 an inziak lut tawh a, inziak lut an la awm belh tura beisei a ni.

Sipaia ṭan tuma Pre-Recruitment Rally-a telte chu Zo Career Solutions-a mithiamte'n thil pawimawhte an zirtir dawn a; AR lamin an inzirna atana mamawh hrang hrangte an tumsak a ni. Exam tura inbuatsaihna bakah, physical test paltlang thei tura hrual an ni bawk ang.