LESDE Minister hoin Kawtchhuah 2024 khâr

Labour, Employment, Skill Development & Entre­preneurship (LESDE) minister Lalnghinglova Hmar chuan nimin khan Industrial Training Institute (ITI) audi­torium-ah 'Kawtchhuah 2024' khârna a hmanpui a, "Hlawhtling turin mi dang aia danglam leh hun hmang ṭangkai nih a ngai," a ti.

Lalnghinglova Hmar chuan, ITI aṭanga mi 4,767-te'n thiamthil an zir chhuak tawh leh chu'ng zinga 50.61%-te'n eizawnna ngêlnghet an nei thei chu ropui a tih thu a sawi a, "Hun vawng dik u la, hnathawh nan hun tam zawk hman tum tur ang che u," a ti a; sorkarin tih tak zeta hma latute puih a tum thu a sawi.

Kawtchhuah hi sorkar laipui Ministry of Skill Development & Entrepreneurship hnuaia Skill Strengthening for Industrial Value Enhancement (STRIVE) project kaltlangin ITI aṭanga zir chhuak zinga an thiamna hmanga mahni kutkawiha ei zawn tumtute puih nana intihsiakna a ni a, kumin hi a vawi hnihna a ni.

January 23-25, 2024 chhung intihsiakna buatsaih a ni a, a ti ṭha zual mi 15 hnenah Minister hian thuchei leh Rs 1,00,000 ṭheuh a hlan. STRIVE kaltlanga ITI tihhmasawnna tur hmanrua hrang hrang 112, cheng nuai 44.47 man chu ITI principal Vanlalhruaia Sailo hnenah a hlan bawk.