Boundary Committee-in hmalakna hmasa chhunzawm zel ṭha an ti; 'A buai hmaa chinfel dan zawn ṭha kan ti' - HM

Mizoram sorkarin tun hnaia a din thar, Mizoram State Boundary Committee chu nimin khan Directorate of Forensic Science Laboratory conference hall-ah an ṭhukhawm a; chairman K Sapdanga, Home minister chuan, sorkarin ramri a buai hmaa chinfel dan zawn ṭha a tih thu a sawi.

Home Minister chuan, ramri buaipuina a rei tawh thu sawiin, "A buai hnuaa ṭhutkhawm chûk chûk ai chuan a buai loh lai hian ramri buai chinfel dan zawng ila kan tih avangin meeting koh a ni," a ti a; ramri chinfel dan tur uluk taka ngaihtuah turin member-te a sáwm.

Ramri him, thlamuang taka mipui an khawsak theihna tur nawr chhuah chu an thupui ber a nih thu sawiin K Sapdanga chuan, "Ṭhenawm state-te nen kan lungrual tlànna tur kan zawn a pawimawh," a ti a; sorkar hmasa hmalaknate chu zahawm a tih thu leh an ngaih pawimawh thu a sawi.

Boundary Committee member secretary H Lalengmawia, Home secretary chuan ramri buaina chingfel tura sorkarin hma a lo lak tawhnate leh hmachhawpte a tarlang.

Home Secretary sawi danin, ramri chungchang sawihona awm tawh ṭhin mah se, official tak chuan kum 2021 khan Boundary Com­mittee din a ni. Sorkar hmasain a din Boundary Committee kha ṭum nga an ṭhukhawm hman a; minister level-ah ṭum thum inbiak a ni.

Minister level-a inbiaknate chu Mizoram sorkar chuan ṭha takin a bawhzui a, Mizoramin a ramri chin nia a ngaih chu Assam sorkarah thehluh a ni tawh. Lehkha chu Assam lamin an hmuh thu sawi mah se, an pawm leh pawm loh an sawi lo. Ramri chinfel kawngah Assam sorkarin Mizoram sorkar a thawhpui ṭha duh lo.

Nimina ṭhutkhawmah hian sorkar hmasa hun tàwp lama Mizoram sorkar leh Assam sorkar indawrna kal tluang lai, Mizoram inthlanpui neih dawn vanga chawlh lailâwk chu tharthawh tura hmalak ṭha an ti a; ramri chungchanga ngaihdan hrang hrang awmte sawiho a nih bakah, hun remchang hmasaah ṭhutkhawm leh an rêl bawk.

Mizoram State Boundary Committee-ah hian vice chairman chu Revenue minister Lalthansanga a ni a; nimina ṭhutkhawmah hian member zingah chief secretary Dr Renu Sharma, DGP Anil Shukla, MKHC, BJP, MPCC, MNF, ZPM, AAP, CYMA, MUP, MZP, MSU, MHIP leh JAC on ILRFD aiawhte an tel.