Hna thawhna tur sum kan dawnte dik taka hman a ni dawn - Duhoma

Chief minister Lalduhoma chuan, a kaihhruai sorkarin hmasawnna hna thawhna tura sum leh pai a dawnte chu dik taka an hman dawn thu a sawi.

CM Lalduhoma hian nimin khan a pisaa NABARD Mizoram general manager KVSSLV Prasada Rao nen an inkawmnaah, eng sum hnár pawh ni se hmasawnna hna thawhna tur an hmuh apiangte chu dik taka hman a nih tur thu sawiin, "A hun taka zawh a nih zel theih nan Project Monitoring Committee chak tak kan din tawh. Hmasawnna hnathawhna kan dawn ṭhinte hi a hluin a lawmawm em em a, dik takin kan hmang ngei tur a ni," a ti.

KVSSLV Prasada Rao chuan, NABARD sum hmanga hnathawhte a hmunah an en vek thei lo tih sawiin, hna tling lo lutuk nia hriatte chu an hnenah hriattir zel ni se an duh thu a sawi a; hna chhia chauh ni lo, hna tihkhawtlai pawh a awm ṭhin nia an hriat thu Chief Minister a hrilh a ni.