National Voters’ Day hman a ni

Nimin January 25 kha National Voters’ Day vawi 14-na a ni a, Mizoram hmun hrang hrangah hman a ni. Aizawlah chuan Governor Dr Hari Babu Kambhampati hoin Assembly Conference Hall-ah hman a ni a, lawmman chi hrang hrang sem a ni.

Governor chuan, Election Commission of India-in hna an thawh ṭhat avangin India ram chu democracy ram hlawhtling, ram dangte tana awhawmah siam a ni mek niin a sawi a; Mizoramin inthlanpui a hmachhawn ṭhin dan chhuanawm a tih thu sawiin, "Mipui, khawtlang hruaitu, kohhran leh pawlte'n Election office ṭha takin an thláwp ṭhin a ni," a ti.

Inkhawmah hian Aizawl district election officer Nazuk Kumar-i'n inlawmna thu a sawi a, chief electoral officer Madhup Vyas pawhin thu a sawi. High school leh higher secondary school zirlaite tana lemziak leh thuziak intihsiaka lawmmante sem a ni a, Aizawl district-a booth level officer (BLO) thawk ṭha mi 12 hnenah BLO Award hlan a ni.

National Voters’ Day pual hian nimin khan sorkar pisa ṭhenkhatah kumina thupui, 'Nothing like voting, I vote for sure' tih hmangin hun hman a ni a, Day thutiam sawi rual a ni bawk.