Swab sample endikna +ve zat 2.45% Mizoram chhunga kái chhâwng - 128
August 30, Pathianni zan thleng khan Mizoram aṭangin swab sample 41,326 endik a ni tawh a, chuta ṭang chuan Covid-19 vei mi 1,011 hmuh chhuah a ni tawh. Hripui vei hmuh tawh zat hi sample endik tawh aṭangin 2.45% a tling.
Covid-19 kai hmuh tawhte chu sipai hrang hranga mi 378, hnam dang driver/handyman 151 leh civil mi 482 an ni a; mi 883 chu Mizoram páwn aṭanga rawn lut an nih laiin, mi 128 chu Mizoram chhunga mi dang aṭanga kái chhâwng an ni. Hetah hian nimina Vairengtea hmuh chhuah mi pakhat telh a la ni lo.
Integrated Diseases Surveillance Programme tarlan leh sorkar thuchhuak aṭanga a lan danin, Mizoram aṭanga swab sample endikna hmasa ber National Institute of Cholera and Enteric Diseases (NICED), Kolkata-ah sample panga endik a ni a; chumi hnuah Guwahati Medical College-ah sample 12 endik niin, Mizorama Covid-19 vei hmasa ber hmuh chhuah a ni.
Mizoram sorkarin Lengpui Airport-a thlawhna thlâwk a tihtawp hnuah Silchar Medical College-ah swab sample endiktir leh niin, mi 41 an endik zingah hripui vei hmuh chhuah a awm lo. April 7 aṭangin Zoram Medical College-ah RT-PCR hmangin swab sample endik ṭan a ni a, August 30 thleng khan sample 28,420 endik a ni tawh.
Lunglei Civil Hospital (LCH)-ah TrueNAT-PCR hmangin swab sample 1,775 endik a ni tawh a, Rapid Antigen Test (RAT) hmangin sample 11,073 endik a ni tawh bawk.
ZMC Covid-19 laboratory-a swab sample 28,420 endik zingah hripui vei mi 746 hmuh chhuah niin, chu chu 2.62% a ni a; LCH laboratory-a sample 1,775 endik aṭangin Covid-19 positive mi 72 hmuh chhuah niin, 4.06% a tling. RAT hmanga sample 11,073 endik aṭanga hripui vei hmuh chhuah mi 192 chu 1.73% a ni.
Sorkarin a tarlan chinah, Mizorama Covid-19 vei hmuh chhuah tawhte chu sipai chi hrang hranga mi 378, hnam dang driver/handyman 151 leh civil mi 482 an ni a; sipai (army leh paramilitary force) zingah BSF tam berin, 235 an ni a, Assam Rifles-te'n dawtin, 102 an ni. Sipai mi leh sa zinga a tam zawk, mi 278 chu an chhuak tawh.
Hnam dang lirthei khalhtu leh puitu, Mizorama rawn zingah hripui vei mi 148 hmuh chhuah a ni tawh a, chu'ng zinga 47 chu chhuak tawhin, mi 101 chu la enkawl mek
an ni.
Tualchhung mi (civil) zingah (hnam dang telin) Covid-19 vei mi 482 hmuh chhuah a ni tawh a, mi 264 chu chhuak tawhin, mi 218 an la chhuak lo thung.
Hetih lai hian, Mizoram luhka hrang hranga screening point-ah nimin tlai dar 4 thleng khan mi 1,60,947 enfiah tawh a ni bawk.