MPCC OB tur official candidate puang

Mizoram Pradesh Congress Committee (MPCC) hruaitu kumin February thlaa thlan turah MPCC official candidate atan president-ah Lal Thanzara, vice president-ah Lalnunmawia Chuaungo, treasurer-ah Dr Lalmalsawma Nghaka te thlan an ni.

Nimina MPCC office bearer-te ṭhukhawm chuan, MPCC elected office bearer leh executive committee member turte thlan hun atan February 20, 2024 an ruat a; elected OB atana MPCC official candidate turte an thlang nghal.

Official candidate tur zingah president atana an ruat Lal Thanzara chu senior vice president ni lai a ni a, vice president leh treasurer ni laite chu an nihna ngai chelh tura thlan an ni.

MPCC GAD chuan, MPCC hruaitu tur thlanna chu boruak zalen tak hnuaiah buatsaih a ni dawn tih tarlangin, "MPCC official candidate ni lote pawh MPCC Danpuiin chuh thei turin a phalsak, a duh apiangte chuan inthlan hi an chuh thei bawk ang," an ti.

Hetih lai hian, MPCC official candidate ni lo zingah Zodintluanga Ralte-in president, C Ngunlianchunga'n vice president leh Lalrindika Ralte-in treasurer chuh an tum nia thu dawn a ni.