Rickshaw khalhtu thah a ni

Myanmar buaina vanga Siaha district-a ráltlân mi pali chuan January 24, Nilaini zan khan auto-rickshaw driver KL Zoasa s/o KL Chhathau, Siaha ECM Veng an that.

Siaha police-te aṭanga Vanglaini thu dawn danin, ráltlânte hian KL Zoasa auto-rickshaw hi Lawngtlaia kal nan an hmang a, Lawngtlai aṭanga lêt tura an chhuah leh hnu, zan dar 9 velah a chhungte'n an be pawp thei tawh lo. Nimin zing dar 10 vel khan a auto-rickshaw chu Siaha daia Council Vety Firm bulah hmuh a ni.

Police-te chuan thu zawhfiah atan auto-rickshaw hmangtute chu an la a, pakhat erawh a tlanbo hman. A tirah pha mah se, hun eng emaw chen thu zawhfiah an nih hnuah an thah a ni tih an puang.

KL Zoasa thattu zinga pakhat chu ruang an dahna hmun nia an sawiah hruai an tum a, mahse, mipui an punkhawm tam avangin an hruai chhuak thei lo. Zoasa ruang hi nizan dar 6:10 khan Lawngtlai aṭanga km. 3 vela hláah kawng aṭanga metre 200 velah hmuh a ni a; Lawngtlai lamin thlahna hun an hman hnuah nizan vêk khan Siaha panpui a ni.