Republic Day vawi 75-na lawm a ni

Nimin January 26, 2024 kha India ram danpui hman ṭanna ni, Republic Day vawi 75-na a ni a, Mizoram hmun hrang hrangah lawm a ni. Mizorama lawmna pui ber Aizawlah chuan zing dar 8-ah Lammualah hun hman a ni a, Governor Dr Hari Babu Kambhampati-a'n hnam puanzar pawt pharhin, parade contingent 27-te'n hnam puanzar chibai an bûk a chháng lêt.

Governor chuan Mizoram mipui Republic Day chibai a bûk a; January 26, 1950-ah India ramin danpui (constitution) a neih aṭangin India chu mipui thlan rorelna ram lian ber an nih thu a sawi a, "Kan ram danpui hi khua leh tui zawng zawng tan dikna, zalenna leh intluktlànna humsak tlat tura duan a ni," a ti.

Tun hnaia Mizoram inthlanpui chu muanawm, felfai leh entawn tlak taka kalpui a nih avangin Mizoram mipui leh mawhphurhna hrang hrang hlen chhuaktute chungah lawmthu sawiin Larsap chuan, "Remna leh muanna venhim hna thawktu police leh dan kengkawhtute hmalakna mai bakah, NGO, kohhran, thuthar thehdarhtute leh mipui ṭhahnemngaihna avangin India rama state muanawm ber kan ni chhunzawm hi a lawmawm hle," a ti a; hmasawn turin remna leh muanna a pawimawh thu a sawi.

Dr Hari Babu Kambhampati chuan, a sorkarin state sumpai dinhmun sawh ngheta tihmasawn turin hmalak a tum tih sawiin, "Sorkar sum hmuh leh hman ral inbûk tâwk leh sum enkawl dan felfai te, inrenchem, hmasawnna kaihhnawih loa sum hman tihtlem leh hmanraw hrang hrang enkawl leh hman dan ṭha leh felfai zawkte kalpui tum a ni," a ti.

Sumpai dinhmun sawh nghet tura insingsak nan hun eng emaw chen sorkarin a mamawh dawn tih sawiin Larsap chuan, "Ka sorkar hian sorkar hmasa hmalaknate pawh chhunzawm âwmte chu a chhunzawm zel dawn," a ti a; ruihhlo dona leh ruihhlo ngaite enkawlna lamah nasa zawka hmalak a nih dawn thu a sawi.

Republic Day lawmnaah hian Padma Shree 2024 dawng turin Thutak Nunpuitu Team dintu leh an hotu Sangthankima thlan a ni tih puan a ni a; ani hi vantlang rawng­bawlna (social works) huanga dawn tur a ni. Governor-in lawmman chi hrang hrang a sem bawk.

Republic Day hi India ramin danpui a neih ṭan ni champha a ni a, India-in Britain aṭanga zalenna a neih hnuah ram danpui tur duan niin, January 26, 1950 khan danpui (constitution) chu hman ṭan a ni.

Governor hian a sorkarin a ngaih pawimawh turte a tarlang a, chu'ng zinga ṭhenkhat chu a hnuaia mite hi a ni:
▶ Sorkar inrêlbàwlna ṭha siam.
▶ Kil tina hmasawnna ngêlnghet leh tlo siam.
▶ Thil siamna lam (industry) ṭanpuina pek leh Hand Holding Policy kalpui.
▶ Khawtlang himna, hriselna leh ei leh bàra vantlang himna leh thlei bik awm loa hmalak.
▶ Ṭhalaite hmakhua ngaihtuah.
▶ Leilung leh a chhunga awmte humhalh.
▶ Hun rei zawk mamawh tur chi hmasawnna lian tham thlen.
▶ Mahni thil thar chhuah leh siam chhuaha innghat economy nei tura hmalak.