Health care thar peih hnai

Health & Family Welfare minister Lalrinpuii chuan, Mizoram State Health Care Scheme (MSHCS) an duan thar chu an peih hnai tawh tih a sawi.

Vanglaini palai zawhna chhangin Lalrinpuii chuan, "Health care thar tur duan mek a ni a, ṭum khat kan ṭhutkhawm leh hunah chuan kan peih theih tawh ngei kan beisei. April 2024 aṭang hi chuan health care scheme thar hman theih tawh kan tum," a ti.

Health Minister sawi danin, MSHCS duan mekah hian tuna hman lai meka bill theih ṭhenkhat chu paih a ni dawn a, chu'ngte chu hriselna kaihhnawih lutuk ni lote a ni hlawm.

ZPM party-in sorkarna an chan hnuah health care scheme changtlung zawk leh ṭha zawk duan an tum a; tun dinhmunah peih a la nih loh avangin sorkar hmasain a duan tawh sa la hman a ni.