House pass dilna Minister kaltlanga lâk ngai ṭhin tihtawp a ni - Revenue Minister

Land Revenue & Settlement (LRS) minister B Lalchhanzova chuan, house pass dilna LRS Minister kaltlang khera lâk ngai ṭhinin mipui tan harsatna a thlen tam zawka a hriat avangin tihtawp a nih thu a sawi.

LRS Minister hian LRS department-in January 25, Ningania an directorate conference hall-a kum 2024 atana inhlan tharna an hman a hmanpuinaah thu sawiin, house pass dilna LRS Minister kaltlang khera lak a ngai ṭhin chu tihtawp a nih thu leh LRS Director kutah a hlan thu a sawi a ni.

B Lalchhanzova chuan, Assam Rifles ram chhuahsan tura mimal ram nei, sorkara hlan let tawhte chu fakawm a tih sawiin, lawmthu sawina lehkha pek vek a tum thu leh, tuna la hlàn lêt lote pawh a mal mala kawm a, chinfel dan zawn a duh thu a sawi.

LRS depatment-a surveyor indaih lohna phuhru turin survey hna mi dang hnena hlan (outsource)-na tur peih tawh a nih thu sawiin Lalchhanzova chuan, "EOI tihchhuah mai theih a ni tawh. Property registration leh thil ṭul danga hman turin E-stamping Rules pawh duan mek a ni a, hei hian mipui tan awlsamna a thlen bakah, stamping aṭanga sorkar sum lak luh a pui hle dawn a ni," a ti.

Revenue Minister chuan, LRS department hnuaiah hna hautak leh uluk taka hmachhawn tur tam tak an nei tih a sawi a; department hmasawnna leh mipui rawngbawlna ṭha zawka an thawh theih nan ngaihtuahna séng turin thawktute a chah a ni.