Police thawk ṭhate chawimawi

Nimina Aizawla Republic Day lawmnaah Governor Dr Hari Babu Kambhampati-a'n police hna thawk ṭha thlan chhuah, kum 2023 Republic Day leh Independence Day-a puan chhuah tawhte hnenah chawimawina (award) a hlan.

1st MAP assistant commandant R Vanlalduata hnenah President's Police Medal for Distinguished Service hlan a ni a; DIG Lalhuliana Fanai, Security deputy SP H Lalduata leh 2nd MAP inspector R Lalrumliana te hnenah Police Medal for Meritorious Service hlan a ni. Hengte hi Republic Day 2023-a thlante an ni.

Independence Day 2023-a thlan an nih angin CID(SB) SP Vanlalfaka Ralte leh Aizawl Police Station-a officer-in-charge Deepak Pathak hnenah nimin khan Police Medal for Meritorious Service hlan a ni.

Republic Day 2024-ah hian President's Police Medal for Distinguished Service dawng turin Mizoram sorkara secretary C Lalzahngoa, MPS chu thlan a ni tih puan a ni a; Police Medal for Meritorious Service dawng turin Aizawl SP Rex Zarzoliana Vanchhawng, inspector Zokunga Hauzel leh sub-inspector CD Lalhmingmawii te thlan an nih thu puan a ni bawk.