Young Indians-in PathFinder an huaihawt

Young Indians (Yi), Mizoram Chapter chuan January 25, 2024 Ningani zan khan Hotel Lalawi-ah PathFinder 2024 an buatsaih a, Labour Employment Skills Development & Entrepreneurship (LESDE) minister Lalnghinglova Hmar-in a hmanpui.

LESDE Minister chuan, Yi ang ṭhalai pawl inzawmkhawm lian, ram hmasawnna kawnga thâ thawh ṭhinte an awm chu a ṭangkai thu sawiin, "Hetiang pawl hi kan mamawh," a ti a, ṭangkai zawka Mizoram tan hma la zel turin a fuih.

Lalnghinglova chuan, ram mipui leh ṭhalaite rilru sûkthlêk leh ngaihtuah phungte ram changkang zawkte ûm phâk tuma ṭan la turin ṭhalaite a sâwm a, "Sumdawnna leh politics thleng pawhin inzar pharh ṭhat a pawimawh. Chutiang nei thei tur chuan Yi hi platform ṭha tak a ni," a ti.

Yi PathFinder 2024-a khualzahawm Jeje Lalpekhlua, MLA chuan, "Ṭhalaite khawvel a ni tawh a, Mizoramah ṭhalai mahni kea ding ngam, sorkar kut ring loa ding thei eng emaw zat kan nei tawh hi a lawmawm, " a ti a; Mizo ṭhalai theihna nei ṭha tak tak, kal ngaihna la hre si lote tan hma la turin kal khawmte a sáwm.

Khualzahawm dang Malsawmzuala Ralte, Mizoram Youth Commission chairman chuan, "Mizoramah ṭhalai hna thawk thei kan tam rualin thawh tur hre lo, nu leh pa hlawh ring kan la tam viau. Ṭhalaite kawng kawhhmuhtu tur leh hna pe theitu tur entrepreneur ṭha kan neih tam a pawimawh," a ti.

Young Indians hi Confederation of Indian Industries hnuaia ṭhalai pawl pakhat a ni a, India rama ṭhalai, sumdawnna kawng hrang hranga mi hlawhtling tak takte intélkhawm pawl a ni. Ṭhalai naupang zawkte hruaitu ṭha ni tura chher chhuah leh India ram hmasawnna tura ram hnuk khawih thilte a bulṭhut aṭanga hmalak an ngai pawimawh a, zirlaite tan thil chi hrang hrang an buatsaih ṭhin a ni.